ماڭعىستاۋ وبلىستىق اۋرۋحاناسىنىڭ كارديوحيرۋرگيا ورتالىعىنىڭ دارىگەرلەرى ەرەكشە وتا جاساعانى تۋرالى دەنساۋلىق ساقتاۋ باسقارماسىنىڭ ءباسپاسوز قىزمەتى حابارلادى.
ءىزباسار ابيەۆكە كەنەتتەن جەدەل جاردەم بريگاداسىن شاقىرتۋعا تۋرا كەلگەن. اۋا جەتىسپەي دەمى قىسىلعان, ەكى اياعى جانە ءىشى ءىسىپ كەتكەن ول, شۇعىل تۇردە وبلىستىق اۋرۋحانانىڭ قابىلداۋ بولىمىنە جەتكىزىلەدى.
دارىگەرلەر 49 جاستاعى اقتاۋ قالاسىنىڭ تۇرعىنىندا جۇرە پايدا بولعان جۇرەك اقاۋى بار ەكەندىگىن انىقتادى. قوس جارمالى قاقپاقشاسىنىڭ كەمىستىگىنىڭ ءتورتىنشى دەڭگەيىنەن وكپە قىسىمىنىڭ كوتەرىلۋىنەن جۇرەك جەتكىلىكسىزدىگى پايدا بولعان, بۇدان ناۋقاس ءولىپ كەتۋى مۇمكىن ەدى.
ماڭعىستاۋ وبلىستىق اۋرۋحاناسىنىڭ كارديولوگيالىق ورتالىعى جۇرەك-قان تامىرلارى حيرۋرگياسى بولىمشەسىنىڭ مەڭگەرۋشىسى, بىلىكتىلىك ساناتى جوعارى دارىگەر ەرنۇر ورداباەۆتىڭ ايتۋىنشا, ناۋقاستا الدىمەن دەمىكپە, ودان سوڭ بۇيرەك جانە باۋىر جەتكىلىكسىزدىگى پايدا بولعان. تولىق مەديتسينالىق تەكسەرۋدەن وتكەن سوڭ بەس ساعاتقا سوزىلعان وتا جاسالدى. ناۋقاس جان ساقتاۋ بولىمىنەن جاقىندا وڭالتۋعا بولىمشەسىنە كوشىرىلدى.
-كەزىندە وعان وتا جاساۋ قاجەتتىگى جونىندە بىرنەشە رەت ايتىلعان. الايدا ءوزى دەر كەزىندە قارالماي جۇرە بەرگەن. ناۋرىز ايىنىڭ سوڭىندا ول اۋىر جاعدايدا اۋرۋحاناعا جەتكىزىلدى. شىنى كەرەك وعان قويىلعان دياگنوز وتە اۋىر. وتا جاساۋ كەزىندە جۇرەكتىڭ قاقپاقشاسىن بولشەكتەپ قايتا جينادىق. ءبىز ناۋقاستى جوعالتىپ الۋعا ءسال قالدىق, سەبەبى ونىڭ جاعدايى وتە اۋىر بولدى. ونىڭ تولىقتاي ساۋىعىپ كەتۋى مۇمكىن, ول ءۇشىن بارلىق دارىگەرلىك قويىلاتىن تالاپتارعا باعىنۋىنا تۋرا كەلەدى, دەپ اتاپ ءوتتى ەرنۇر احان ۇلى.
الداعى ۋاقىتتا ناۋقاس مىندەتتى تۇردە دارىگەرلەردىڭ باقىلاۋىندا بولماق. ال جاعدايى قالىپتى دەڭگەيگە ءتۇسۋى ءۇشىن ۋاقىت كەرەك. ءىزباسار ابيەۆ وتادان سوڭ نەۆرولوگيا جانە وڭالتۋ بولىمشەسىنە اۋدارىلدى.
-نەگىزگىنەن جۇرەگىم 2016 جىلدان بەرى اۋىرىپ باستادى. كۇنى بۇگىنگە دەيىن ءمان بەرمەي جۇرە بەردىم, كەيدە شانشۋ بولاتىن, ۋاقىت وتە وزدىگىنەن جازىلىپ كەتەر دەپ ۇمىتتەندىم. جاقىندا بىردەن دەنساۋلىعىم ناشارلاي ءتۇستى, اياق-قولىم قالشىلداپ تىنىسىم تارىلدى, شۇعىل جەدەل جاردەم شاقىرتۋعا تۋرا كەلدى. اۋرۋحاناعا جاتقىزدى, دارىگەرلەر كەلىپ وتا جاساۋ قاجەتتىگىن ايتتى, بىردەن كەلىسىم بەردىم. بارلىعىنا العىس ايتامىن, وتا ويداعىداي ءوتتى, دەيدى ءىزباسار ابيەۆ.
قازىر كارانتين, سول سەبەپتى ناۋقاسقا تۋىسقاندارى جىبەرىلمەيدى. ال ءىزباسار بولسا وتباسىمەن تەك تەلەفون ارقىلى بايلانىسىپ وتىر. وسى جۇمادا ۇيىنە جىبەرىلەدى.