ەلدەگى توتەنشە جاعدايعا بايلانىستى قازىرگى كەزدە قازاقستانداعى بارلىق ىشكى جانە 100 پايىزعا جۋىق حالىقارالىق رەيستەر توقتاعان.
يندۋستريا جانە ينفراقۇرىلىمدىق دامۋ ءمينيسترى ب.اتامقۇلوۆ ۇكىمەت وتىرىسىندا كوروناۆيرۋستىق پاندەمياعا بايلانىستى ازاماتتىق اۆياتسيا سالاسىنىڭ شىعىندارىنا قاتىستى دەرەكتەردى اتاپ ءوتتى. ازاماتتىق اۆيتسيا سالاسىنىڭ بولجامىنا سايكەس, جىل اياعىنا دەيىن سالاداعى وپەراتسيالىق كىرىستەردىڭ شىعىنى شامامەن 300 ملرد تەڭگەنى قۇراۋى مۇمكىن.
ەلدەگى ىشكى جانە حالىقارالىق رەيستەردىڭ توقتاتىلۋىنا قاراماستان, اعىمداعى جىلدىڭ ءبىرىنشى توقسانىندا جولاۋشىلار تاسىمالىنداعى ء وسۋ قارقىنى ساقتالىپ, جولاۋشىلار سانى 1,7 ميلليوندى قۇراعان. بۇل وتكەن جىلدىڭ وسى كەزەڭىمەن سالىستىرعاندا 5,2% ارتىق.
ۆەدومستۆو باسشىسى وسى وتىرىستا اۋەجايلاردىڭ قۇرىلىسى مەن جوندەۋ جۇمىستارىنىڭ بارىسىنا توقتالدى. بيىلعى جىلى تۇركىستاندا جاڭا حالىقارالىق اۋەجاي مەن شىمكەنتتە جاڭا جولاۋشىلار تەرمينالىن اشۋ جوسپارلانىپ وتىر. ءۇرجار اۋەجايىنىڭ ۇشۋ-قونۋ جولاعىن قايتا قالپىنا كەلتىرۋ جۇمىستارىن باستاپ, وسكەمەن جانە ءۇشارال اۋەجايلارىنداعى تاعى ەكى ۇقج-نى قايتا قۇرۋ باستالاتىن بولادى.
سونداي-اق «نۇرلى جول» باعدارلاماسى اياسىندا الداعى 5 جىلدا جەرگىلىكتى اۋە قوزعالىسىنا ارنالعان 13 اەرودروم سالۋ جوسپارلانۋدا. قازىرگى كەزدە جەرگىلىكتى اۋە جەلىلەرىندە 3 اەرودروم ء(ۇشارال, ءۇرجار, زايسان) قولدانىستا. ال 13 ايماقتىق اەرودرومنىڭ قۇرىلىسى 2022 جىلى باستالادى دەپ جوسپارلانۋدا.