ماڭعىستاۋ وبلىسىنىڭ ورتالىعىندا بۇعان دەيىن 11 شاعىناۋدان 10 ءۇي جانە 14 شاعىناۋدان 38 ءۇي مەكەنجايلارى بويىنشا ەكى ءۇيدىڭ پودەزى سىرتىنان بەكىتىلگەن بولاتىن. ولاردا تۇراتىن كەيبىر تۇرعىندار ۆيرۋستىق ينفەكتسيا جۇقتىرۋى سەبەپتى ستاتسيونارعا جىبەرىلدى. اقتاۋ قالالىق تاۋارلار مەن كورسەتىلەتىن قىزمەتتەردىڭ ساپاسى جانە قاۋىپسىزدىگىن باقىلاۋ باسقارماسىنىڭ باسشىسى اسيما جارىلعاسوۆا ايماقتىق ماڭعىستاۋ وبلىسىنىڭ قوعامدىق كوممۋنيكاتسيا ورتالىعىندا ونلاين فورماتىندا وتكەن ارنايى بريفينگتە قازىرگى احۋالدى بايانداپ بەردى.
- 11 شاعىن اۋدانداعى 10 ءۇيدىڭ ءۇشىنشى پودەزى كارانتين مەرزىمى اياقتالۋىنا سايكەس اشىلدى. مۇندا تۇراتىن ادامدار توتەنشە جاعداي ءتارتىبى بويىنشا قالا ىشىندە وزدىگىمەن قوزعالا الادى. بۇل مەكەن-جاي جابىلعالى بەرى ەشكىم دەرت جۇقتىرعان جوق. وقشاۋلاۋدىڭ باستى ارتىقشىلىعى دا وسىندا. الگى پودەزدىڭ 1-5 قاباتىنا دەيىن سانيتارلىق تازالاۋ جاسالدى. ۆيرۋس جۇقتىرعان ادامداردىڭ پاتەرلەرى زالالسىزداندىرىلدى. جالپى بۇل ۇيدەن باستاپ 10 مەترگە دەيىن جەر اۋماعى تولىق ديزەنفەكتسيالاندى, - دەدى ول.
سونداي-اق بۇگىن 14 شاعىن اۋدانداعى 38 ءۇيدىڭ پودەزى دە كارانتيننەن اشىلدى. قازىرگى ۋاقىتتا وبلىس اۋماعىندا 370 ادام دارىگەرلەردىڭ باقىلاۋىندا. ون ازامات وڭىرلىك جۇقپالى اۋرۋلار اۋرۋحاناسىندا ستاتسيوناردا ەم قابىلداپ جاتىر. ەكەۋى ساۋىعى سەبەپتى ۇيلەرىنە جىبەرىلگەن.
ال پروۆيزورلىق گوسپيتالدا 52 ادام جاتىر. وبسەرۆاتسيالىق ورىندا 61 تۇرعىن جاتىر. تاعى 247 ادام ءۇي كارانتينىنە الىنعان.