قازىر الەمدىك احۋالعا ايرىقشا اسەر ەتىپ وتىرعان كوروناۆيرۋس ينفەكتسياسى ەڭ قيىنى بالالارعا دا جۇعىپ جاتىر. ۇرپاقتىڭ اماندىعىنا الاڭدايتىن ءار اتا-انا مەن ەرەسەك ادامدا «بالانى قاۋىپتى ىندەتتەن قورعانۋعا قالاي شاقىرامىن؟» دەگەن سۇراق تۋاتىنى انىق. بۇل ساۋالعا ءبىز دە جاۋاپ ىزدەپ كوردىك.
بىرىككەن ۇلتتار ۇيىمى جانىنداعى UNICEF بالالار قورى وسىعان وراي ارنايى تانىمدىق كەڭەستەر تىزبەگىن ۇسىنعان. وندا ىندەت تارالعان ەلدەردەگى بالالاردا ۇيرەنشىكتى ومىردەن قول ءۇزىپ, ءۇي كارانتينىندە بولعان جاعدايدا تۇسىنىسپەۋشىلىكتىڭ تۋىندايتىنى ايتىلعان. بىزدىڭشە, بارىنەن بۇرىن جاقىن ادامى كوروناۆيرۋسپەن اۋىرسا نەمەسە ءتىپتى ءوزى سىرقاتتانىپ قالسا, ياكي ەڭ قىمبات ادامىنىڭ (اناسى, اكەسى, ەرەسەسك باۋىرى) ولىمگە اكەلىپ سوقتىرۋى مۇمكىن قاتەرمەن بەتپە-بەت كۇرەسىپ جۇرگەن دارىگەر بولسا, پسيحيكالىق كۇيزەلىسكە ءتۇسىرۋى مۇمكىن. قايتپەك كەرەك؟
UNICEF ۇسىنعان 8 كەڭەستىڭ العاشقىسىندا اشىق سۇراقتار قويىپ, تىڭداۋ كەرەكتىگى جازادى. وسى تاقىرىپتى تالقىلاپ, بالاڭىزبەن تىنىش جەردە سويلەسۋ ءۇشىن ارنايى ورىن مەن ۋاقىت ءبولۋ قاجەت.
«بالاڭىزدىڭ وسى تاقىرىپ جايلى نە بىلەتىندىگىن انىقتاپ, ءسوزىن بولمەي تىڭداڭىز. ەگەر بالالاردىڭ جاسى تىم كىشكەنتاي ءارى وسى اۋرۋ تۋرالى مۇلدە ەستىمەگەن بولسا, سىزگە بۇل تاقىرىپتى كوتەرۋدىڭ قاجەتى بولماۋى مۇمكىن, سوندىقتان ولارعا قاۋىپتى جاعداي جايلى ايتپاي-اق قويعان ابزال. ونىڭ ورنىنا گيگيەنا ەرەجەسىن قالاي ساقتاۋ كەرەكتىگىن ەسكە سالىپ, كورسەتىڭىز.
بالاڭىزدىڭ ەركىن سەزىنىپ, سويلەۋىنە مۇمكىندىك بەرىڭىز. بۇل ءۇشىن سۋرەت سالۋ, ەستەلىكتەردى ايتىپ بەرۋ جانە باسقا دا ادىستەر ارقىلى بالاڭىزدىڭ اشىق سويلەسۋىنە جاعداي جاساڭىز.
ەڭ باستىسى, ولاردىڭ پروبلەمالارىنا بولماشى نارسە رەتىندە قاراماڭىز نەمەسە ولاردان قاشپاڭىز. بالالاردىڭ سەزىمدەرىن قابىلداپ, مۇنداي جاعدايدا قورقىنىشتىڭ پايدا بولۋى زاڭدى ەكەندىگىن ءتۇسىندىرىڭىز. ءسىز ولارعا ءوزىڭىزدىڭ مۇقيات تىڭداپ وتىرعاندىعىڭىزدى ءبىلدىرىپ, كەز كەلگەن ۋاقىتتا سىزبەن جانە مۇعالىمدەرىمەن سويلەسە الاتىندىعىنا كوىنز جەتكىزىڭىز», دەلىنگەن ءبىرىنشى كەڭەستە.
UNICEF-ءتىڭ اتا-انالارعا ارنالعان كەڭەستەرىن تولىعىراق مىنا جەردەن وقي الاسىز.