جامبىل وبلىستىق پوليتسيا دەپارتامەنتىنىڭ حابارلاۋىنشا, وبلىستىڭ جامبىل اۋدانى, جالپاقتوبە اۋىلىنىڭ ماڭىندا پوليتسيا قىزمەتكەرلەرى قىزمەتتىك ءيتتىڭ كومەگىمەن 35 جاستاعى ەر ادامدى ۇستاعان. قولعا تۇسكەن كولىك جۇرگىزۋشىسى بلوك-بەكەتتەن ەسىرتكى الىپ وتپەك بولعان.
«اتالعان اۋىل ماڭىنداعى بلوك-بەكەتتە وبلىستىق پوليتسيا دەپارتامەنتىنىڭ جەرگىلىكتى پوليتسيا قىزمەتى جانە ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى «اۋدي-100» ماركالى اۆتوكولىگىن توقتاتىپ, ونى تەكسەرۋ بارىسىندا جۇرگىزۋشى كۇرتەسىنىڭ ىشكى قالتاسىنان ەسىرتكى زاتىن تاپتى», دەلىنگەن دەپارتامەنت حابارلاماسىندا.
سوت-حيميالىق ساراپتامانىڭ قورىتىندىسىنا سايكەس, تاركىلەنگەن زاتتىڭ ماريحۋانا ەكەندىگى بەلگىلى بولعان. سونىمەن قاتار, وبلىستىق پوليتسيا دەپارتامەنتى ۇستالعان ازامات ءوز كىناسىن تولىق مويىنداعانىن, قازىرگى تاڭدا قازاقستان رەسپۋبليكاسى قىلمىستىق كودەكسىنىڭ 296-بابى, 2-بولىگى ءبويىنشا سوتقا دەيىنگى تەرگەۋ باستالعانىن حابارلادى.
جامبىل وبلىسى