قازىرگى كەزدە ەل وڭىرلەرى كوكتەمگى تىرشىلىك قامىنا كىرىسكەن. توتەنشە جاعدايعا قاراپ وتىرعان اۋىل ەڭبەككەرلەرى جوق. نەگىزگى تالاپتاردى قاتاڭ ساقتاي وتىرىپ, قالايدا ەگىستىڭ قامىمەن دالا توسىندە ءجۇر.
وسى ورايدا قازاق ۇلتتىق اگرارلىق ۋنيۆەرسيتەتىنىڭ بىلىكتى ۇستاز-عالىمدارى اۋىلشارۋاشىلىق تاۋار وندىرۋشىلەرىنە كەڭەس بەرىپ, قولداۋ كورسەتۋ ماقساتىندا اپتاسىنا ەكى رەت تىكەلەي ونلاين كونفەرەنتسيا وتكىزىپ كەلەدى.
وندا اۋىل كاسىپكەرلەرى مەن اگرارلىق سالا قىزمەتكەرلەرى تىكەلەي بايلانىسقا قوسىلىپ, وزدەرىنە قاجەتتى اقپاراتتار مەن پايدالى كەڭەس الۋدا.
«وسىمدىك شارۋاشىلىعىنداعى زاماناۋي تەحنولوگيالار: جاڭا تاسىلدەر مەن شەشىمدەر» تاقىرىبىنا ارنالعان كەزەكتى ونلاين كەڭەس بارىسىندا قر ۇعا كوررەسپوندەنت-مۇشەلەرى, عزي ديرەكتورلارى, كافەدرا مەڭگەرۋشىلەرى س.ب. كەنەنباەۆ, ت.ە. ايتباەۆ, س.ق. قالدىباەۆ, ت.ر. رىسپەكوۆ, ت.ب. ساراپشى ماماندار اۋىل كاسىپكەرلەرىنىڭ سۇراقتارىنا جاۋاپ بەردى.
تىكەلەي ەفيردە قازاقستاننىڭ بارلىق وڭىرلەرىنەن جولدانعان سۇراقتارعا ماماندار جاۋاپ بەردى. توپىراقتىڭ قۇنارلىلىعىن ارتتىرۋ ءۇشىن مينەرالدىق تىڭايتقىشتاردى ەنگىزۋ, اۋىل شارۋاشىلىعى داقىلدارىن وسىرۋدە تەحنولوگيالاردى پايدالانۋ, ەگىستىكتەرگە مونيتورينگ جۇرگىزۋ, اۋىل شارۋاشىلىعى داقىلدارىنىڭ وتاندىق ەليتالىق تۇقىمدارىن ساتىپ الۋ, ەگىس توپىراقتارىنىڭ قۇرامىن انىقتاۋ, ەگىستىكتىڭ باستاپقى جاعدايىن قالپىنا كەلتىرۋ, توزعان جايىلىمداردى قالپىنا كەلتىرۋ جانە ت. ب. سۇراقتارعا شارۋالار تۇششىمدى جاۋاپ الدى.
سونداي-اق, اۋىل شارۋاشىلىعى ونىمدەرىن وندىرۋشىلەر ايماقتارداعى تاجىريبەلەرىمەن ءبولىستى.
بۇگىندە ۋنيۆەرسيتتەگى «سيتۋاتسيالىق ورتالىق» جۇمىسى جۇيەلى جولعا قويىلعان. وقۋ ورنى سايتىنداعى «اگرودامۋ» پاراقشاسىنا فەرمەرلەر وزدەرىن مازالاعان سۇراقتارىن جولداۋىنا بولادى. ۋنيۆەرسيتەت عالىمدارى ولارعا مىندەتتى تۇردە جاۋاپ بەرەدى. تىكەلەي ەفيردەگى ونلاين كەڭەستەرگە ۋنيۆەرسيتتىڭ facebook الەۋمەتتىك جەلىسىندەگى رەسمي پاراقشاسى ارقىلى قوسىلۋعا بولادى.
الماتى