ب.ساعىنتاەۆ: كاسىپورىندار قىزمەتىن جانداندىرۋدىڭ باستى شارتى – سانيتارلىق قاۋىپسىزدىكتى ساقتاۋ

ونلاين رەجيمىندە وتكەن كەزدەسۋدىڭ باستى ماسەلەسى – قىزمەتكەرلەردىڭ سانيتارلىق قاۋىپسىزدىگىن قامتاماسىز ەتۋ جانە ولاردىڭ كوروناۆيرۋستىق ينفەكتسيانى جۇقتىرىپ الماۋىنا جاعداي جاساۋ.

بەلگىلى بولعانداي, پرەزيدەنت جانىنداعى مەملەكەتتىك كوميسسيانىڭ شەشىمىمەن ونەركاسىپتىك جانە قۇرىلىس سەكتورلارى مەن ىلەسپە قىزمەتتەر كورسەتەتىن كومپانيالار كاسىپورىندارىنىڭ قىزمەتىن كەزەڭ-كەزەڭىمەن قايتا جاڭعىرتۋ تۋرالى شەشىم قابىلداندى.

«بۇل ۇدەرىستى ءبىز 20 ساۋىردەن باستاپ باستاۋدى جوسپارلاپ وتىرمىز. ەڭ باستىسى – قىزمەتكەرلەردىڭ قاۋىپسىزدىگىن قامتاماسىز ەتۋ جانە دەنساۋلىعىن قورعاۋ جونىندەگى سانيتارلىق-ەپيدەميولوگيالىق ەرەجەلەردى قاتاڭ ساقتاۋدى نازارعا الۋ كەرەك», - دەدى قالا اكىمى باقىتجان ساعىنتاەۆ.

سونداي-اق ول زاڭ بۇزۋشىلىقتار انىقتالعان جاعدايدا كاسىپورىندارعا ەلدەگى توتەنشە جاعداي اياقتالعانعا دەيىن جۇمىس ىستەۋگە تىيىم سالىناتىنىن اتاپ ءوتتى.

الداعى ەكى-ءۇش كۇن ىشىندە اكىمدىك پەن «اتامەكەن» ۇكپ جانە تاۋارلار مەن قىزمەتتەردىڭ قاۋىپسىزدىگىن باقىلاۋ كوميتەتى دەپارتامەنتىنىڭ وكىلدەرى كىرگەن كوميسسيا كاسىپورىنداردىڭ دايىندىعىن تەكسەرەدى.

باستى نازار جەكە قورعانىس قۇرالدارىنىڭ, سانيتايزەرلەرمەن جابدىقتالۋىنا, وندىرىستىك جانە كەڭسە ءۇي-جايلارىن وڭدەۋگە, كىرە بەرىستەگى قىزمەتكەرلەردىڭ دەنە قىزۋىن باقىلاۋعا جانە سانيتارلىق قورعاۋدى قامتاماسىز ەتۋدىڭ باسقا دا شارالارىنا اۋدارىلاتىن بولادى.

جەكەلەگەن سالالار بويىنشا ارنايى ازىرلەنگەن حاتتامالاردا كورسەتىلگەن تالاپتارعا سايكەس كەلگەن كەزدە قىزمەتكە رۇقسات بەرەتىن اكت بەرىلەتىن بولادى. تۇراقتى مونيتورينگ كەزىندە زاڭ بۇزۋشىلىقتار انىقتالعان جاعدايدا اكت كەرى قايتارىلىپ, قىزمەتى توقتاتىلادى.

كاسىپورىن باسشىلارى ءوز پىكىرلەرىن ايتىپ, جۇمىستى جاڭا جاعدايدا باستاۋعا جانە ءوز قىزمەتكەرلەرىنىڭ قاۋىپسىزدىگىن قامتاماسىز ەتۋگە دايىن ەكەندىكتەرىن ءبىلدىردى. ولار سونداي-اق اكىمدىك پەن جەدەل شتاب قابىلداعان, قاتاڭ سانيتارلىق-ەپيدەميولوگيالىق ەرەجەلەردى ساقتاي وتىرىپ, قالانىڭ ەكونوميكالىق بەلسەندىلىگىن قالپىنا كەلتىرۋگە باعىتتالعان شەشىمدەردى قولدادى.

«ەڭ باستىسى – ءبىزدىڭ قىزمەتكەرلەردىڭ ءومىرى مەن دەنساۋلىعى», - دەدى ونەركاسىپ جانە قۇرىلىس سالالارىنىڭ باسشىلارى.

بۇعان دەيىن حابارلانعانداي, الماتىدا جۇمىسپەن قامتىلعاندار سانى 728 مىڭ ادامعا قىسقاردى. ولاردىڭ ىشىندە 200 مىڭ ادام قاشىقتان جۇمىس جاساۋ رەجيمىنە كوشكەن, نەگىزىنەن قارجى سەكتورىندا, سونداي-اق ءبىلىم بەرۋ, مەملەكەتتىك باسقارۋ, اقپارات جانە بايلانىس سالالارىندا جۇمىس ىستەيدى. ناتيجەسىندە, 300 مىڭعا جۋىق ادام ۋاقىتشا تابىسسىز قالدى.

20 ساۋىردەن باستاپ ونەركاسىپ كاسىپورىندارىنىڭ, قۇرىلىس سالاسىنداعى كومپانيالاردىڭ, قۇرىلىس ماتەريالدارىنىڭ كوتەرمە ساۋدا نارىعىنىڭ جۇمىسىن ىسكە قوسۋ جوسپارلانۋدا. سونداي-اق, الدىن الا جازىلۋ بويىنشا نوتاريۋستار جانە الماتىنىڭ ناۋرىزباي اۋدانىنداعى حقكو-نىڭ ءبىر كەڭسەسى تەك بيزنەسكە قىزمەت كورسەتۋ ءۇشىن جۇمىس ىستەيدى.

وسى سالاداعى كاسىپورىنداردى ىسكە قوسۋ ءبىر اي ىشىندە جۇمىسپەن قامتىلعان حالىقتىڭ سانىن قوسىمشا 90 مىڭ ادامعا ۇلعايتۋعا مۇمكىندىك بەرەدى. بۇل رەتتە جۇمىس بەرۋشىلەر قاتاڭ سانيتارلىق نورمالاردى ساقتاۋ ءۇشىن دەربەس جاۋاپتى بولادى. قىزمەتكەرلەردى COVID-19-دان قورعاۋ جونىندەگى ءىس-شارالاردىڭ تولىق ءتىزىمى بارلىق ونەركاسىپتىك جانە قۇرىلىس نىساندارى ءۇشىن ازىرلەنگەن.

سونىمەن قاتار, قالاداعى ەپيدەميولوگيالىق جاعدايدى ەسكەرە وتىرىپ, بارلىق نىساندار جۇمىس كوميسسياسى تاراپىنان قاجەتتى سانيتارلىق تالاپتارعا سايكەستىگى تۇرعىسىنان اۋديتتەن كەيىن عانا كەزەڭ-كەزەڭىمەن اشىلاتىن بولادى.