قىزىلوردا وبلىسىندا پوليتسەيلەردى بالاعاتتاعان تۇرعىن ۇستالدى. بۇل تۋرالى وبلىستىق پوليتسيا دەپارتامەنتىنىڭ ءباسپاسوز قىزمەتى حابارلايدى.
14 ءساۋىر كۇنى جالاعاش اۋدانى اۋماعىندا وبلىس ورتالىعىنىڭ 28 جاستاعى تۇرعىنى پوليتسيا قىزمەتكەرلەرىنىڭ زاڭدى تالاپتارىنا باعىنباي, ولارعا ءتىل تيگىزگەن. “Toyota-camry” ماركالى اۆتوكولىگىندەگى بۇل ازاماتقا بۇقارباي باتىر اۋىلىنىڭ تۇسىندا ورنالاسقان سانيتارلىق بەكەتتەگى پوليتسيا قىزمەتكەرلەرى جالاعاش كەنتىنە كىرۋگە رۇقسات بەرمەپتى. ول ءوزىن توقتاتقانداردى بالاعاتتاپ, زاڭدى تالاپتارىنا باعىنباي, پوليتسەيلەردىڭ ءبىرىنىڭ اياعىن كولىگىمەن باسىپ ءوتىپ, وقيعا ورنىنان بوي تاسالاعان.
اۋداندىق پوليتسيا ءبولىمى قىزمەتكەرلەرىنىڭ جەدەل ارەكەتتەرى ناتيجەسىندە بيلىك وكىلىنە ءتىل تيگىزگەن ازامات ۇستالىپ, پوليتسيا بولىمىنە جەتكىزىلدى. وعان قاتىستى كارانتين رەجيمىن بۇزعانى ءۇشىن قر اكىمشىلىك قۇقىق بۇزۋشىلىق تۋرالى كودەكسىنىڭ 476-بابىنا سايكەس اكىمشىلىك ءىس قوزعالىپ, اۋداندىق سوتقا جولداندى. سوت قاۋلىسىمەن قۇقىق بۇزۋشى ەكى تاۋلىككە قاماققا الىندى.
ودان بولەك, بيلىك وكىلىن قورلاۋ دەرەگى بويىنشا قر قىلمىستىق كودەكسىنىڭ 378-بابىنىڭ 1-بولىگىمەن سوتقا دەيىنگى تەرگەپ – تەكسەرۋ امالدارى جۇرگىزىلىپ جاتىر.