قىزىلوردا وبلىسىندا وتكەن تاۋلىكتە تاعى 12 تۇرعىننىڭ بويىنان ۆيرۋس تابىلىپ, ناۋقاستار سانى 143 ادامعا جەتتى. بۇل تۋرالى وبلىستىق دەنساۋلىق ساقتاۋ باسقارماسىنىڭ باسشىسى جاقسىلىق ابدىسامەتوۆ وڭىرلىك كوممۋنيكاتسيالار قىزمەتىندە وتكەن بريفينگتە ايتىپ بەردى.
– جاڭادان انىقتالعان 12 ناۋقاستىڭ ۇشەۋى قىزىلوردا قالاسىنان بولسا, توعىزى جاڭاقورعان اۋدانىنان. ولاردىڭ 11-ءى بۇرىن انىقتالعان ناۋقاستارمەن جاقىن قارىم-قاتىناستا بولعانداردىڭ اراسىنان شىعىپ وتىر. ال 1 ناۋقاس جەزقازعان قالاسىندا ۆاحتالىق ادىسپەن جۇمىس جاساپ كەلگەن. قاۋىپتى ىندەت جۇقتىرعانداردىڭ بارلىعى جۇقپالى اۋرۋلار اۋرۋحاناسىنا اۋىستىرىلىپ, ءتيىستى ەمدەرىن قابىلداۋدى باستادى, – دەدى جاقسىلىق ابىلقاسىم ۇلى.
سالا باسشىسى ايماق دارىگەرلەرى قاۋىپتى ىندەتكە شالدىققانداردى انىقتاۋدىڭ بەلسەندى ساتىسىنا كوشكەندىگىن اتاپ ءوتتى. ناۋقاس نەعۇرلىم ەرتە انىقتالسا, سوعۇرلىم ەمدەۋ شارالارى تەز باستالادى. ەم دە ناتيجەلى بولادى.
– سوندىقتان دا ناۋقاستار سانىنىڭ كۇرت كوبەيۋىنەن قورقۋدىڭ قاجەتى جوق. قاۋىپسىزدىك تالاپتارىن بارىنشا ساقتاپ, شەكتەۋ شارالارىن ەستەن شىعارمايىق, – دەدى ايماقتىڭ باس دارىگەرى.