الماتى وبلىسىنداعى ءتورت ت ۇلىك مال ورگىزىپ, تاناپتا ەگىن ءوسىرىپ وتىرعان اۋداننىڭ ءبىر – اقسۋ. ياعني, ءوڭىر ەكونوميكاسىنىڭ تابىستى بولۋىنا اگروونەركاسىپ كەشەنى مولىنان ۇلەس قوسىپ وتىر.
بيىل اقسۋ اۋدانى بويىنشا 61017 گەكتارعا اۋىل شارۋاشىلىق داقىلدارىن سەبۋ جوسپارلانعان بولاتىن. قازىر ديقاندار كۇزدىك بيداي, جازدىق بيداي, جازدىق ارپا ەگىلەتىن القاپتارداعى جۇمىستى قىزدىرىپ, ءىس باسىندا ءجۇر. بۇيىرسا, 3167 گەكتار جەرگە داڭقتى داقىل – قانت قىزىلشاسىنىڭ تۇقىمىن سەبۋ بىرەر كۇندە باستالماق. شارۋالار ءتاتتى ءتۇبىردى سەبۋگە كۇن رايىن عانا باعىپ, ساقاداي ساي دايىن وتىر.
جالپى, ەلىمىزدەگى توتەنشە جاعداي تالابى مەن الماتى وبلىسى اۋماعىندا جاريالانعان كارانتين شەكتەۋى دە كوكتەمگى دالا جۇمىستارىنىڭ ۋاقتىندا باستالۋىنا كەدەرگى كەلتىرگەن جوق. شارۋالارعا مەملەكەت تاراپىنان ارزانداتىلعان تۇقىم مەن جانار-جاعار ماي دەر كەزىندە جەتكىزىلدى. مىسالعا, اقسۋ اۋدانىنداداعى شارۋا قوجالىقتارىنا ديزل وتىنىنىڭ ءار ءليترى 165 تەڭگەدەن اكەلىنگەن. قىرداعى جۇمىسقا قول بايلاۋ بولماۋى ءۇشىن اۋدان ورتالىعىنداعى اۋىل شارۋاشىلىعى تەحنيكالارىنىڭ قۇرال-سايماندارىن ساتاتىن دۇكەندەر دە جۇمىسىن جالعاستىرۋدا. قىسقاسى, ەگىس ناۋقانىنىڭ توقتاپ قالماۋىنا بارلىق جاعداي جاسالۋدا.
قازىر اۋدان بويىنشا 528 دانا اۋىل شارۋاشىلىعى تەحنيكالارى تەحنيكالىق تەكسەرۋدەن ءوتىپ, ەگىس القاپتارىنداعى جۇمىستارعا كىرىستى, 14-دانا قانت قىزىلشاسىنىڭ سەپكىشتەرى جۇمىسقا دايىن. اۋداندا قانت قىزىلشاسىن سەبۋمەن اينالىساتىن 6-سەرۆيستىك دايىنداۋ ورتالىقتارى جۇمىس ىستەيدى, ونىڭ سىرتىندا 4 ءىرى شارۋا قوجالىقتارىندا قانت قىزىلشاسىن سەبۋگە ارنالعان تەحنيكالارمەن تولىق قامتىلعان.