كوروناۆيرۋس ىندەتىنە قارسى كۇرەس بويىنشا باتىس قازاقستان وبلىسى كوميسسياسىنىڭ شۇعىل شتابىنىڭ مالىمەتىنشە, 16 ءساۋىر كۇنى تاڭەرتەڭ وڭىردە ۆيرۋس جۇقتىرعانداردىڭ سانى 25-كە جەتتى.
باتىس قازاقستان وبلىسىندا كوروناۆيرۋس ينفەكتسياسىن جۇقتىرعان تاعى 5 ادام انىقتالدى. ولاردىڭ ءبارى وبلىس تۇرعىندارى, - دەدى وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆ.
ءبىر ناۋقاس رەسەي فەدەراتسياسىندا ۆاحتالىق ادىسپەن جۇمىس جاسايتىن كوروناۆيرۋستىق ينفەكتسيا انىقتالعان ازاماتپەن بىرگە كەلگەن. ەكىنشى ازامات كوروناۆيرۋسقا شالدىققان ناۋقاسپەن بايلانىستا بولعان ادام رەتىندە تىركەلدى. ال قالعان ۇشەۋى – رەسەي فەدەراتسياسىندا ۆاحتالىق ادىسپەن جۇمىس ىستەيتىن ازاماتتار ەكەن.
رەسەي فەدەراتسياسى شەكاراداعى «تاسقالا» بەكەتىندە سانيتارلىق كارانتين بەكەتى قىزمەتكەرلەرى كەلۋشىلەردەن ساۋالناما الىپ, تەرمومەتريامەن قاشىقتان تەكسەرۋ كەزىندە ەكى ادامنىڭ دەنە قىزۋى كوتەرىلگەنى بايقالعان. ولاردى COVID-19 زەرتحانالىق تەكسەرۋ ءۇشىن جەدەل جاردەم كولىگى شاقىرتىلىپ, كارانتيندىك ستاتسيونارعا جاتقىزىلدى. كەيىن ولاردىڭ COVID-19 دياگنوزى ناقتىلاندى.
«قازىر ناۋقاستار وبلىستىق جۇقپالى اۋرۋلار اۋرۋحاناسىنا جاتقىزىلدى. ولارمەن قارىم-قاتىناستا بولعان ادامدار انىقتالۋدا. اۋرۋ وشاقتارىندا دەزينفەكتسيالىق جۇمىس جۇرگىزىلۋدە. ەپيدەمياعا قارسى ءىس-شارالار جالعاسۋدا»,- دەيدى نۇرلىبەك مۇستاەۆ.
سونىمەن, سوڭعى مالىمەتتەر بويىنشا باتىس قازاقستان وبلىستىق جۇقپالى اۋرۋلار اۋرۋحاناسىندا – 24 ادام, پروۆيزورلىق ستاتسيوناردا – 70 ادام, كارانتين ورتالىعىندا – 113 ادام, ال ءۇي كارانتينىندە 1370 ادام وقشاۋلانۋدا.
باتىس قازاقستان