بۇگىندە جامبىل وبلىسىندا ورنالاسقان ءوندىرىس ورىندارىنىڭ جۇمىسىن ىلگەرىلەتۋ, كاسىپكەرلەردى قولداۋ ماسەلەلەرى قولعا الىنۋدا. وسى ورايدا وبلىس اكىمى بەردىبەك ساپارباەۆ «Jardem-109» مونيتورينگ جانە جەدەل ارەكەت ەتۋ اقپاراتتىق ورتالىعىندا بولىپ, «تاراز بىلعارى اياقكيىم» جشس فابريكاسىندا, «تا-ماك» جشس-ىنە جانە «بم» وندىرىستىك كاسىپورنىنا باردى.
تاراز قالاسى اكىمدىگىنىڭ 109 بىرىڭعاي ديسپەتچەرلىك قىزمەتى وبلىس ورتالىعىنىڭ تىنىس-تىرشىلىگىنە قاتىستى ءارتۇرلى ماسەلەلەر بويىنشا ازاماتتاردىڭ وتىنىشتەرىنە جەدەل ارەكەت ەتۋ ماقساتىندا قۇرىلعان. الايدا بۇل قىزمەت بۇگىندە ءوز مىندەتىن تولىقتاي اتقارىپ وتىرعان جوق. وسىعان بايلانىستى 109 قىزمەتىن وبلىس اكىمى اپپاراتىنىڭ قاراماعىنا بەرۋ جانە ونىڭ بازاسىندا بۇكىل وبلىستى قامتيتىن بىرىڭعاي بايلانىس ورتالىعىن قۇرۋ ماسەلەسى ءوز شەشىمىن تابادى. «بۇل ورتالىقتا وبلىستاعى جۇمىستاردىڭ احۋالى تۋرالى بارلىق اقپارات شوعىرلانۋى ءتيىس. وسى رەتتە قازىرگى ۋاقىتتاعى كوروناۆيرۋستىق ينفەكتسياعا قارسى ارەكەت ەتۋ بويىنشا تولىق اقپاراتتىق بازا قۇرۋ قاجەت. سونداي-اق مۇندا بارلىق الەۋمەتتىك تولەمدەر, مەملەكەتتىك باعدارلامالاردى ىسكە اسىرۋ جانە جەرگىلىكتى اتقارۋشى ورگاندار قىزمەتىنىڭ باسقا دا سالالارى بويىنشا بازا قالىپتاستىرىلادى. ورتالىق قىزمەتكەرلەرى ازاماتتاردىڭ كەلىپ تۇسكەن وتىنىشتەرىنە جەدەل نازار اۋدارىپ جانە ولار تاراپىنان تۋىنداعان ماسەلەلەردى شەشۋ جولدارىن قاراستىرۋعا مىندەتتى», دەدى بەردىبەك ساپارباەۆ.
بۇدان سوڭ ول «تاراز بىلعارى اياقكيىم» جشس-نە باردى. ءبىر كەزدەرى بۇل كاسىپورىننىڭ ءونىمى تەك قازاقستاندا عانا ەمەس, شەتەلدەردە دە تانىمال بولاتىن. الايدا, كەيىنگى ۋاقىتتا زاۋىت ۇلكەن قيىندىقتاردى باستان وتكەردى. بۇگىندە مۇندا اسكەري قىزمەتشىلەر مەن جۇمىسشىلارعا ارنالعان باتەڭكەلەر دايىندالادى. بىراق زاۋىت قارىزدارى جىل ساناپ وسۋدە. كاسىپورىن باسشىلىعىنا تۇتىنۋشىلاردىڭ سۇرانىسىنا ساي تاۋارلاردىڭ جاڭا تۇرلەرىن شىعارۋ مۇمكىندىگىن قاراستىرۋ كەرەكتىگى ۇسىنىلدى. ال, «تا-ماك» جاۋاپكەرشىلىگى شەكتەۋلى سەرىكتەستىگىنىڭ «ارزۋ» ماكارون فابريكاسىندا جۇمىس قىزۋ جۇرۋدە. ونىڭ جايما, كەسپە, لاعمان ونىمدەرى قازاقستان اۋماعىندا جوعارى سۇرانىسقا يە. تۇتىنۋشىلاردى ءونىمنىڭ ساپاسى مەن ونىڭ تۇپنۇسقا وراماسى قىزىقتىرادى. اتالعان كاسىپورىن ديرەكتورى گۇلميرا كونكاشەۆانىڭ ايتۋىنشا, الداعى ۋاقىتتا كاسىپورىننىڭ جاڭا وندىرىستىك جەلىسىن ىسكە قوسۋ جوسپارلانىپ وتىر ەكەن. ول بويىنشا يتاليالىق كاسىپكەرلەرمەن ورتاق كەلىسىم دە جاسالعان. بەردىبەك ساپارباەۆ كاسىپورىن باسشىلىعىنا روجكي, ۆەرميشەل سەكىلدى جاڭا ءونىم تۇرلەرىن شىعارۋدى ۇسىندى. مۇنداي ونىمدەر وڭىردەگى ساۋدا جەلىسىنە ەلىمىزدىڭ باسقا ايماقتارىنان جانە شەتەلدەردەن جەتكىزىلەتىنىن اتاپ ءوتتى. سونداي-اق جامبىل اۋدانىنىڭ جالپاقتوبە اۋىلىندا ورنالاسقان «بم» وندىرىستىك كاسىپورنىندا دا جۇمىستاردىڭ ىلگەرىلەۋى بايقالۋدا. اتالعان جشس باس ديرەكتورى سۇلتان ماحمادوۆتىڭ ايتۋىنشا, بۇگىندە زاۋىت قۇراما جەم وندىرۋگە ماماندانعان. ال جۋىردا كوروناۆيرۋستىڭ تارالۋىنا بايلانىستى مۇندا انتيسەپتيكتەر شىعارىلادى. بەردىبەك ساپارباەۆ كاسىپورىن قىزمەتىن وڭ باعالاپ, ونىڭ دامۋىنا بارىنشا قولداۋ كورسەتۋگە ۋادە بەردى.
جامبىل وبلىسى