مەكتەپتەردەگى قاشىقتان وقىتۋ بارىسى قالاي جۇرگىزىلىپ جاتقانىن ءبىلۋ ماقساتىندا ەلىمىزدىڭ ءار وڭىرىندەگى وقۋشىلارمەن سويلەسىپ كوردىك. سوندا كوپ ءبىلىم الۋشىلاردىڭ قاشىقتان وقىتۋ اياسىن ءوز مۇمكىندىگىنىڭ مول ەكەندىگىنە قاراماستان شەكتەپ وتىرعانىن بىلدىك. وسى ولقىلىقتىڭ ورنىن تولتىرۋ ماقساتىندا اتا-انالار مەن بالالاردى, سونداي-اق ءالى دە كوپ نارسەدەن حابارسىز مۇعالىمدەردى قازىرگى تاڭدا كەڭ تارالعان ءبىلىم بەرۋ پلاتفورمالار جونىندە جازۋدى ءجون كوردىك.
ءبىز تىلدەسكەن بالالاردىڭ دەرلىگى جەكە نوۋتبۋك, ينتەرنەت تارتىلعان تەلەفونى بولا تۇرا تەك تەلەارناداعى ساباقتاردى قاراپ, WhatsAرر الەۋمەتتىك جەلىسى ارقىلى ءۇي تاپسىرماسىن جولداۋمەن جاڭا فورماتتىڭ اياسىن تارىلتىپ ءجۇر. شىن مانىندە قازىر ەشقانداي مەگابايت الماي-اق ءوز ءونىمىن, كونتەنتىن تەگىن ۇسىنىپ وتىرعان ءبىلىم بەرۋ پلاتفورمالارى بارشىلىق. مىنە, وسى سايتتارمەن تولىعىراق تانىستىرماقپىز.
قازىر مۇعالىمدەر اراسىندا كەڭ قولدانىسقا يە بولىپ وتىرعان ءبىلىم بەرۋ پلاتفورماسىنىڭ ءبىرى – Daryn.online. پلاتفورمانىڭ نەگىزىن قالاۋشى ايبەك قۋاتبايدىڭ مالىمدەۋىنشە, 2 ملن 219 مىڭ وقۋشى جانە 138 مىڭ 922 مۇعالىم تىركەلگەن. مۇندا قازىردىڭ وزىندە 1-11 سىنىپتارعا ارنالعان 1416 ۆيدەو ساباق بار. ۇبت تاپسىرۋعا دا بولادى. باستىسى تىركەلىپ الاسىز, ءارى قاراي وقۋشىنىڭ جەكە كابينەتى بولادى. ايتپاقشى, بۇل پلاتفورمانىڭ ءموبيلدى قوسىمشاسى دا بار. ونى بۇگىندە 1 ملن 100 مىڭ ادام كوشىرىپ الىپتى. پلاتفورما مۇعالىمدەر ءۇشىن دە وتە ىڭعايلى, ولار member.daryn.online جاڭا جۇيەسى ارقىلى وقۋشىلاردىڭ وپەراتسيالارىن (ۆيدەو قاراعانىن, تەست تاپسىرعانىن, تاپسىرما ورىنداعىنان) قاداعالاي الادى.
ەكىنشى ۇسىنىلاتىن ءبىلىم بەرۋ پلاتفورماسى – Bilimland. بۇل جۇيە مەكتەپتەر قاشىقتان وقىتۋعا كوشكەن العاشقى 5 كۇندە 15 ملن 100 مىڭ قارالىم جينادى. Bilimland ءبىلىم بەرۋ پلاتفورماسىنىڭ ماڭىزى سول – تەلەارنالارداعى ساباقتاردى وسى سايتتان قايتا كورۋگە مۇمكىندىك بەرەدى. ءيا, «قايتالاۋ – ءبىلىم اناسى» دەسەك, ونىڭ ۇستىنە كەيبىر تۇستارىن تۇسىنبەي قالعان وقۋشىلار ءۇشىن بەينەساقتى قايتالاپ كورۋ جاڭا تاقىرىپتى جاقسىلاپ يگەرۋگە كومەكتەسەتىنى ءسوزسىز. وقۋشىعا ىڭعايلىسى – جاڭا ساباقتى بەينە ارقىلى مۇعالىم تۇسىندىرەدى, سونان سوڭ جاتتىعۋلار جاسالادى. جاڭا تاقىرىپتى مىسال-جاتتىعاۋلارمەن تۇسىنگەننەن كەيىن ءۇي تاپسىرماسى بەرىلەدى. مۇعالىم دە ءۇش دەڭگەيلى تاپسىرمالاردى ورىنداعان وقۋشىسىمەن فورۋمدار ارقىلى تۇسىنبەگەن تۇستارىن تالقىلاي الادى.
Kundelik.kz جۇيەسىمەن تانىسپاعان مۇعالىمدەر مەن وقۋشىلار نەكەن-ساياق بولار. بۇل سوزىمىزگە ءبىلىم جانە عىلىم ءمينيسترى اسحات ايماعامبەتوۆتىڭ: ء«بىر عانا Kundelik.kz جۇيەسىندە 32 ملن رەت سەكتسيا بولىپتى, ياعني وسىنشا رەت سايتقا كىرۋ ارەكەتى تىركەلدى. بۇل – رەكورد. ءبىز Egov پورتالىنداعى 15 ملن سەسسيانى كوپ دەگەنبىز. سونىمەن سالىستىرعاندا ءبىلىم بەرۋ سالاسىنىڭ ءبىر عانا جۇيەسىندەگى سەسسيا ەكى ەسە كوپ كورسەتكىش كورسەتىپ وتىر», دەگەنىنەن انىق بايقاۋعا بولادى. دەسە دە ونى توتەنشە جاعداي كەزىندە قولدانۋدى تەگىن ەتكەنىنەن كوبى حاباردار ەكەنىنە كۇمانىمىز بار. وقۋشىنىڭ ەڭ قاجەتتى قۇرالى – كۇندەلىك قوي, بۇل سونىڭ ەلەكتروندى نۇسقاسى. ال مۇعالىمدەرگە قاجەتتى كەزى كوپ, ماسەلەن, 1-10 سىنىپتارعا ارنالعان 2019-2020 وقۋ جىلىنىڭ بجب جانە تجب جونىندە ەسكەرتپەلەرىمەن تانىسۋعا بولادى.
Bilimal.kz – بالاڭىزدىڭ ءبىلىمى مەن الەۋەتىن زاماناۋي باسقارۋ جۇيەسى. بۇل جوبا اتا-انالارعا بالالارىنىڭ ءبىلىم الۋىن باقىلاۋعا كومەكتەسۋ ءۇشىن قۇرىلعان. سايتتاعى دەمو-كۇندەلىككە كىرىپ, تىركەلۋ ارقىلى اتا-انا بالاسىنىڭ ساباق كەستەسىن, كۇندەلىكتەگى باعالارىن, توقساندىق جانە جىلدىق قورىتىندى باعالارى كورسەتىلگەن تابەلىن, سىنىپ ساعاتتارىن, مۇعالىمدەر ءتىزىمىن, توقساندىق وقۋ جوسپارىن, پاندەر بويىنشا ۇلگەرىم گرافيگىن كورە الادى. بۇل ءۇشىن البەتتە مەكتەپ وسى ءبىلىم بەرۋ پاتفورماسىمەن جۇمىس ىستەيتىن بولۋى كەرەك.
Mektep Smart Nation – جالپى ورتا ءبىلىم بەرۋ سالاسىندا مەملەكەتتىك قىزمەتتەردى الۋعا ارنالعان بىرىڭعاي پورتال, ورتا ءبىلىم بەرۋ ۇيىمدارىنىڭ جالپىعا قول جەتىمدى ءتىزىمى كورسەتىلگەن مەكتەپتى باسقارۋ جۇيەسى. مۇندا بالانى مەكتەپكە تىركەۋگە, مەكتەپ اۋىستىرۋعا مامانداندىرىلعان مەكتەپتەرگە ورنالاستىرۋ جانە سىنىپتان سىنىپقا اۋىستىرۋ ءوتىنىشىن بەرۋگە, لاگەرگە جولداما الۋعا, قاجەتتى ايماقتان ءبىلىم بەرۋ ۇيىمىن تاڭداۋعا مۇمكىندىك بار.
تestcenter.kz – ۇلتتىق تەستىلەۋ ورتالىعىنىڭ سايتى. بۇل ورتالىق سايتى ارقىلى ەلىمىزدەگى بارلىق بيىلعى مەكتەپتى ءتامامدايتىن وقۋشىلارعا توتەنشە جاعدايعا بايلانىستى تەگىن ۇبت سىنىق ەمتيحاندارىن تاپسىرۋعا جانە دايىندالۋعا جاعاداي جاساپ وتىر. بۇل تۋرالى ورتالىقتىڭ ديرەكتورى ديدار سماعۇلوۆتىڭ: «117 مىڭ تۇلەككە ارنالعان جاعىمدى جاڭالىعىمىز بار. سايتىمىزدا ۇلتتىق بىرىڭعاي تەستىلەۋدىڭ ونلاين بايقاۋ سىناقتارىن تەگىن ەتتىك. بۇعان قوسا, تەستتەر بازاسىن ماكسيمالدى تۇردە جاڭارتىپ, ءار پاننەن 70 بىرەگەي نۇسقا ەنگىزدىك», دەپ سۇيىنشىلەگەنى ەسىمىزدە.