قىزىلوردا قالاسىنىڭ №2 سوتىندا قازاقستان رەسپۋبليكاسىنىڭ قك-ءنىڭ 190-بابىنىڭ 3-بولىگى 1-تارماعىمەن الاياقتىققا قاتىستى قىلمىستىق ءىس قارالدى. بۇل تۋرالى وبلىستىق پروكۋراتۋرانىڭ سايتىندا جاريالاندى.
ءىس قۇجاتتارىنا سايكەس, بۇرىن الاياقتىق ءۇشىن سوتتى بولعان ازامات الماتى قالاسىنا بارىپ, 20 مىڭ تەڭگەگە جالعان جەكە كۋالىك جاساتادى. بىرنەشە كۇن وتكەننەن كەيىن وزگە بىرەۋدىڭ اتىنا دايىندالعان وسى جەكە كۋالىكتى الىپ, سونىڭ اتىنان قۇقىق بەرەتىن جالعان رەسمي قۇجاتپەن قىزىلوردا قالاسىنداعى بانك فيليالىنا كەلەدى. بانك قىزمەتكەرىنىڭ سەنىمىن تەرىس پايدالانىپ, نەسيە راسىمدەۋ ارقىلى 4 874 000 تەڭگەنى قالتاسىنا باسادى.
جالعان قۇجات ارقىلى نەسيە الىپ, ءوز قاجەتىنە جاراتقان ازامات قازاقستان رەسپۋبليكاسىنىڭ قك-ءنىڭ 190-بابىنىڭ 3-بولىگىنىڭ 1-تارماعىمەن كىنالى دەپ تانىلىپ, 4 جىل 6 ايعا باس بوستاندىعىنان ايىرىلدى.