وبلىستا بيىل الەۋمەتتىك سالانىڭ 26 نىسانىنىڭ قۇرىلىسىن جۇرگىزۋ كوزدەلگەن. تۇرعىن ءۇي قۇرىلىسى بويىنشا مەملەكەتتىك باعدارلاما اياسىندا 19 جالدامالى, 3 نەسيەلىك تۇرعىن ءۇي سالۋ قولعا الىندى.
وبلىستىق قۇرىلىس باسقارماسىنىڭ ماماندارى كارانتين كەزىندە قۇرىلىس نىساندارىندا سانيتارلىق تالاپتىڭ قاتاڭ ساقتالۋىن باقىلاپ وتىر. كارانتين شارالارىنا قاراماستان, وبلىس ورتالىعىندا قۇرىلىس قارقىندى جۇرۋدە. جىل باسىنان ءبىلىم بەرۋ, دەنساۋلىق ساقتاۋ, مادەنيەت, سپورت, تۇرعىن ءۇي جانە ينجەنەرلىك ينفراقۇرىلىم نىساندارىنىڭ قۇرىلىسىنا 26,7 ميلليارد تەڭگە بولىنگەن. وعان «جول كارتاسى», «اۋىل-ەل بەسىگى» سياقتى جاڭا باعدارلامالار قوسىلىپ, قارجى كولەمى 36,8 ميلليارد تەڭگەگە دەيىن ۇلعايدى.
–بيىل قۇرىلىس كولەمى كوبەيىپ كەلەدى. ماسەلەن, قۇرىلىس كولەمىنىڭ يندەكسى 1 توقساندا 117 پروتسەنتتى قۇرادى. 151 مىڭ شارشى مەتر تۇرعىن ءۇي پايدالانۋعا بەرىلدى. بيىل قۇرىلىس جۇمىسىن قارقىندى جۇرگىزەمىز دەپ جوسپارلانىپ وتىرمىز,–دەيدى وبلىستىق قۇرىلىس باسقارماسى باسشىسىنىڭ ورىنباسارى ەلەنا ىسقاقوۆا.
مەملەكەتتىك باعدارلاما اياسىندا سوڭعى 3 جىلدا 1,4 ميلليون شارشى مەتر تۇرعىن ءۇي پايدالانۋعا بەرىلگەن. ءسويتىپ, 13 مىڭنان اسا اقمولالىق باسپانامەن قامتىلدى. جەكە قۇرىلىس كومپانيالارى دا تۇرعىن ءۇي قۇرىلىسىن قارقىندى جۇرگىزۋدە.