ەلباسى نۇرسۇلتان نازارباەۆ «بولاشاققا باعدار: رۋحاني جاڭعىرۋ» اتتى ماقالاسىندا ەلىمىزگە ينجەنەرلەر مەن دارىگەرلەردىڭ عانا ەمەس, قازىرگى زاماندى جانە بولاشاقتى تەرەڭ تۇسىنەتىن بىلىكتى گۋمانيتارلىق سالا ماماندارىنىڭ دا اۋاداي قاجەت ەكەنىن ايتتى. تاريح پەن ساياساتتانۋ, الەۋمەتتانۋ, فيلوسوفيا, پسيحولوگيا, پەداگوگيكا, ەكونوميكا, مادەنيەتتانۋ جانە فيلولوگيا عىلىمدارى بويىنشا ستۋدەنتتەرگە زاماناۋي ءبىلىم بەرۋگە قاجەتتى جاعداي جاساۋدى تاپسىردى. وسى مىندەتتى ىسكە اسىرۋ ماقساتىندا «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى قولعا الىندى.
اتالعان جوبا اياسىندا الداعى بىرنەشە جىلدا گۋمانيتارلىق ءبىلىمنىڭ بارلىق باعىتى بويىنشا دۇنيە جۇزىندەگى ەڭ بەدەلدى ۋنيۆەرسيتەتتەردىڭ وقۋلىقتارى شەت تىلدەرىنەن قازاقشاعا اۋدارىلىپ, ستۋدەنتتەرىمىزگە الەمدەگى ۇزدىك جوو-نىڭ تاڭداۋلى ۇلگىلەرىمەن ءبىلىم الۋعا مۇمكىندىك تۋدى. قازىردىڭ وزىندە 42 كىتاپ «قازاقشا سويلەپ تۇر», قالاعان ادام وقۋلىقتاردى kitap.kz ەلەكتروندى اشىق كىتاپحاناسىنان تاۋىپ, وقي الادى. اۋدارىلعان كىتاپتار بيزنەس, مەنەدجمەنت, ديپلوماتيا, فيلوسوفيا, حالىقارالىق قۇقىق, ماركەتينگ, ادەبيەت, ءتىل, ونەر, پەداگوگيكا, پسيحولوگيا, الەۋمەتتانۋ, مەديا, ەكونوميكا, تاريح, ءدىن, فيلوسوفيا الەمىن قامتيدى. وقۋلىقتار رەسپۋبليكا بويىنشا 130 جوو-نا تاراتىلدى.
وسى ءبىر ۇلكەن ءىستى ۇيىمداستىرىپ وتىرعان ۇكىمەتتىك جانە كوممەرتسيالىق ەمەس «ۇلتتىق اۋدارما بيۋروسى» قوعامدىق قورىنىڭ وكىلدەرى اۋدارىلاتىن كىتاپتاردى تاڭداۋ ءۇشىن ەلىمىزدەگى بارلىق وقۋ ورىندارىنان ۇسىنىس جينالىپ, جالپى سانى 800-دەن اسا وقۋلىق اتاۋى كەلىپ تۇسكەنىن مالىمدەدى. جيناقتالعان تىزىمدەردىڭ نەگىزىندە بىرنەشە رەت باسىلعان, سوڭعى باسىلىمى كەيىنگى 3 جىلدا شىققان, مازمۇندىق تۇرعىدان بەيتاراپ بولۋى قاجەت دەگەن تالاپتارعا سۇيەنە وتىرىپ, 2017 جىلعا 18 وقۋلىق تاڭدالدى. جوسپارعا ساي, بۇل وقۋ قۇرالدارى قازاق تىلىنە اۋدارىلىپ, جوو-نا تەگىن جەتكىزىلدى. جاڭا وقۋلىقتار 2018-2019 وقۋ جىلىنان باستاپ جوعارى ءبىلىم بەرۋ جۇيەسىنە ەنگىزىلدى.
ءدال وسى 2018 جىلدىڭ العاشقى جارتىجىلدىعىندا وتكەن 18 وقۋلىقتىڭ تانىستىرىلىمىنا ەلباسى ن.نازارباەۆ ارنايى قاتىسقان بولاتىن. سونداعى سوزىندە ن.نازارباەۆ:
– جاستارىمىز جوعارى عىلىمي ستاندارتتارعا سايكەس ءبىلىم الۋعا ءتيىس. سوندىقتان ءبىز 800 كىتاپتان تۇراتىن ۇزدىك وقۋلىقتاردىڭ اۋقىمدى ءتىزىمىن ازىرلەدىك. ۇلتتىق اۋدارما بيۋروسى قۇرىلىپ, جۇمىسىنا كىرىستى. بۇگىنگى العاشقى زياتكەرلىك ترانش اقش, رەسەي, ۇلىبريتانيا, فرانتسيا جانە شۆەيتساريا سياقتى الدىڭعى قاتارلى ەلدەردىڭ ەڭ ۇزدىك عىلىمي ەڭبەكتەرىن قامتيدى. جاڭا وقۋلىقتار – ەكسكليۋزيۆتى گۋمانيتارلىق كىتاپحانا. بۇل وقۋلىقتار كوپشىلىك ءۇشىن كىتاپ تۇرىندە, ەلەكتروندى ونلاين نۇسقاسىندا جانە ۇزدىك لەكتورلاردىڭ اشىق دارىستەرىنىڭ ۆيدەوتەكاسى سياقتى ءۇش فورماتتا قولجەتىمدى بولماق. كىتاپتار لاتىن قارپىندە باسىپ شىعارىلعاننان كەيىن, ولاردى شەتەلدە تۇراتىن جاستارىمىز دا وقي الادى, – دەدى. سونداي-اق وسى وتىرىستا ەلباسى ۇكىمەت پەن ۇلتتىق اۋدارما بيۋروسىنا اتالعان جوبانى ودان ءارى جەتىلدىرىپ, جوسپارعا ساي جۇيەلى جانە جەمىستى جۇزەگە اسىرۋعا تاپسىرما بەرگەن بولاتىن.
قازىرگى تاڭدا 26 كىتاپ اۋدارىلىپ جاتىر. ولاردىڭ قاتارىندا كينو, ەستەتيكا, زاڭ, انتروپولوگيا, ەتنولوگيا, ەكونوميكا, مۋزىكا, قارجى, تەاتر, ستاتيستيكا, ساياساتتانۋ, مەديا سالاسىنا قاتىستى تاڭداۋلى وقۋلىقتار بار. ىرىكتەلگەن وقۋ قۇرالدارىن قازاق تىلىنە اۋدارۋعا قازاقستاننىڭ الدىڭعى قاتارلى وقۋ ورىندارىنىڭ وقىتۋشىلارى, بىلىكتى اۋدارماشىلار مەن رەداكتورلار, جالپى سانى 300-گە جۋىق مامان قاتىسۋدا. ماتىندەر ادەبي جانە عىلىمي رەداكتسيالاۋدان وتەدى. مۇنداي اۋقىمدى عىلىمي اۋدارما جوباسىنىڭ قازاقستاندا بۇرىن-سوڭدى ىسكە اسپاعانىن ەسكەرسەك, 100 وقۋلىقتىڭ گۋمانيتارلىق سالا ماماندارى ءۇشىن التىن قور بولاتىنى اقيقات.