كوكشەتاۋ: جاستار تەاترىنىڭ بولاشاعى زور

«جاستار جىلى» اياسىندا اشىلعان تەاتردىڭ العاشقى اياق الىسى جايىندا «ەگەمەن قازاقستان» گازەتى ارقىلى تارالدى. سونىڭ ارقاسىندا  وزگە ايماقتاردا وسىنداي ونەر ۇجىمدارىنىڭ باس كوتەرۋىنە ۇلگى بولا ءبىلدى. تەاتر ترۋپپاسى قۇرىلعانىنا كوپ ۇزاماي-اق اقتوبە قالاسىنىڭ 80 جىلدىعىنا ارنالعان «بالاۋسا» حالىقارالىق فەستيۆالىنە قاتىسىپ كەلەدى. قاتىسىپ قانا قويماي ول جەردەن قالا اكىمىنىڭ سىيلىعى مەن ارنايى نوميناتسياسىن جەڭىپ اكەلگەن. كەلگەننەن كەيىن بۇگىنگى كۇننىڭ ماڭىزدى ماسەلەسى - بالالاردىڭ سمارتفونعا تاۋەلدىلىگىن اشىپ كورسەتەتىن «اسقار مەن اسىق» اتتى ەرتەگىنى ساحنالاۋعا كىرىستى.

تەاتر ترۋپپاسىنىڭ نەگىزگى قۇرامى اقان سەرى اتىنداعى جوعارى مادەنيەت كوللەدجىنىڭ ستۋدەنتتەرىنەن جاساقتالعان. سايكەسىنشە ۇجىمداعى كوللەدج ستۋدەنتتەرى وقۋ بىتىرگەن سوڭ ءىرى قالالارداعى ونەر وردالارىنا وقۋعا ءتۇستى. ءبىرازى ءار وڭىردەگى تەاترلارعا جۇمىسقا ورنالاستى. «EL Jastar» تەاترىنىڭ جاستارى ءوز جولدارىن تاۋىپ, ونەر جولىنداعى بيىك ماقساتتارىمەن, اسقاق ارماندارىنا جول تارتقانى قۋانتادى.

تەاتردىڭ ارت-ديرەكتورى حاكىم حاسانباي مەن كوركەمدىك جەتەكشىسى فارحادبەك كانافين نامىسقا تىرىسىپ, بيىل وقۋ جىلى باستالىسىمەن تاعى دا سول كوللەدج ستۋدەنتتەرىنەن ىرىكتەپ, جاڭا ترۋپپا قۇرىپ شىققان. بيىلعى جىلدى اباي جىلى دەپ بەلگىلەگەن ساتتەن باستاپ اقىن شىعارماشىلىعىن ناسيحاتتاۋ ماقساتىندا پەرفورمانس جانرىنداعى «جاستىقتىڭ وتى, قايداسىڭ؟!» اتتى سپەكتاكلى دايىندالعان. ءتىپتى كوكشەتاۋداعى اباي جىلى اقپان ايىنىڭ باسىندا وسى قويىلىممەن اشىلىپتى.

بۇل قويىلىمعا ءۇش اي ۋاقىتىن سارپ ەتكەن قوس ماماننىڭ ەڭبەگى زور. وسىنداي كەزدە جوعارىدا اتالعان مادەنيەت كوللەدجىنىڭ ديرەكتورى قۇرالاي عازيزقىزى قول ۇشىن بەرىپ, قولداۋ تانىتقان. ول كوللەدج قابىرعاسىندا وقيتىن تالانتتى جاستاردىڭ ۇيىمداسىپ, ۇلكەن ىسكە بىلەك سىبانا كىرىسكەنىن كوگەن سوڭ, دايىندالۋلارىنا بارىنشا جاعداي جاساعان. ساحنا, كوستيۋم, بالەتمەيستەر, دىبىس, جارىق وپەراتورى دا سان قىرلى مامان دايارلايتىن وسى كوللەدجدەن تابىلا كەتكەن. پرەمەراعا كەلگەن ەل اعالارى جاستاردىڭ ونەرگە دەگەن ماحابباتىن كورىپ, العىستارىن ايتىپ, باتالارىن دا بەرىپتى. كوكشەتاۋداعى جانايدار مۋسين اتىنداعى جوعارى قازاق پەداگوگيكالىق كوللەدجىنىڭ ديرەكتورى نۇرتاس احات ۇلى 250 مىڭ تەڭگە كولەمىندە سەرتيفيكات تابىس ەتسە, قۇرالاي عازيزقىزى 180 مىڭ تەڭگە كولەمىندە سەرتيفيكات تابىستاعان. بۇل جاناشىرلىقتان تۋعان قولداۋ. 

«EL Jastar» تەاترى ابايعا ارنالعان سپەكتاكلمەن كوكشەتاۋ وبلىسىنداعى اۋدان مەن قالالاردى ارالاپ شىعامىز دەگەندە كوروناۆيرۋستىڭ سالدارىنان ءىس-شارالارعا تىيىم سالىنىپ, تەاتردىڭ اياعى تۇسالىپ قالدى. دەسە دە ولار وسى ساتتە شىعارماشىلىق ىزدەنىس ۇستىندە جۇرگەندەرىن ايتادى.

«EL Jastar» تەاترى ابايعا ارنالعان وسى سپەكتالمەن وبلىستاعى اۋداندار مەن قالالاردى ارالاپ شىعۋدى جوسپارلاپ وتىر. سونداي-اق, قاي جاقتا تەاتر فەستيۆالى وتسە, سوعان قاتىسپاق ويلارى بار جاستاردىڭ قۇلاعى تۇرىك. بيىلعى جىلدان كۇتەرى كوپ ونەرلى جاستاردىڭ ءۇمىتى وشپەي, جىگەرى جاسىماسا ەكەن دەيمىز.