سوڭعى كۇندەرى اقتوبە قالاسى تۇرعىندارى اراسىندا قىتاي دارىگەرلەرى كەلىسىم بويىنشا كۆي مەن بەتپە-بەت كەلىپ جۇرگەن ارىپتەستەرىنە كومەككە كەلەدى ەكەن, مۇنداي جاعدايدا الەمگە كوروناۆيرۋس ينفەكتسياسى تارالۋىنىڭ العاشقى وشاعى بولعان مەملەكەتتەن كەلگەندەردىڭ پايداسىنان گورى, زيانى كوبىرەك بولىپ جۇرمەي مە؟ كارانتين كەزىندە شەت ەلدىكتەردى ەلگە كىرگىزۋ ونىڭ تالاپتارىن بەلدەن باسۋ بولىپ شىقپاي ما دەگەن الاڭداۋ مەن قاۋىپ قىلۋ سيپاتىنداعى الىپ-قاشپا سوزدەر كوبەيىپ كەتتى.
بۇعان نە دەۋگە بولادى؟ راس, اقتوبەلىك دەنساۋلىق ساقتاۋ ۇيىمدارى بۇعان دەيىن رەسەي, وڭتۇستىك كورەيا, اقش سەكىلدى مەملەكەتتەردەگى سەرىكتەس-ارىپتەستەرىمەن بايلانىس پەن قارىم-قاتىناستار جاساپ كەلدى. سونىڭ ىشىندە قىتاي دا بار ەدى. مۇنداعى باستى ماقسات – ءوزارا تاجىريبە الماسۋ جانە ەم جاساۋعا قاتىستى بىرقاتار وتكىر ماسەلەلەردى بىرلەسىپ تالقىلاۋدىڭ وزەگىنە اينالدىرۋ ەكەنى دە تالاس تۋعىزبايدى. ال ەندى قازىرگى جاعدايدا كەلۋدىڭ استارىندا نە سىر بار؟ جەل تۇرماسا ءشوپتىڭ باسى قيمىلدامايدى ەمەس پە؟ الدە جەرگىلىكتى وكىلەتتى ورگاندار راسىمەن دە ولاردى اقتوبەگە شاقىردى ما؟
پاندەنميا ءبارىمىز ءۇشىن بۇرىن بەتتەسىپ كورمەگەن جاڭا سىناق. «اتىسىپ كورمەگەن جاۋ» ەكەنى حاق. بۇدان ءار ەل قازىردىڭ وزىندە ءوز بايلامدارى مەن پايىمدارىن جاساپ ۇلگەرگەندەرى دە بەلگىلى. مىنە, وسىدان كەلىپ, ناۋقاس سىرىن ءتۇيسىنىپ, ونى ەمدەۋگە قاي قىرىنان كەلۋ كەرەكتىگى جونىندە جاڭا ۇعىم تۇسىنىكتەر قالىپتاسپاق. بۇل رەتتە مەملەكەتارالىق تۇرعىدا ءۇن قاتىسۋ مەن ءوزارا وي-پىكىر الماسۋدىڭ قاجەت ەكەندىگى ايان. ايتسە دە مۇددەلى ۇيىمدار مەن پىكىرلەسۋ كەزىندە وبلىستا ازىرگە قىتايلىق مامانداردى كومەككە شاقىرۋ جونىندەگى ماسەلە تۇرماعانىن انىقتادىق.
سونداي-اق تۇرعىنداردى الاڭداتىپ جۇرگەن تاعى ءبىر ءجايت قحر-دان گۋمانيتارلىق كومەك رەتىندە جەتكىزىلگەن مەديتسينالىق قۇرال-جابدىقتاردىڭ, سونىڭ ىشىندە بەتپەردەلەر مەن قورعانىستىق كيىمدەردىڭ ساپاسى جايىندا كۇمان-كۇدىكتەر كوبىرەك بولىپ جۇرگەنىن ايتۋعا ءتيىسپىز. ويتكەنى ينفەكتسيالىق زاردابى وتە اۋىر دەپ وزگە ەلدە ەمەس, ءدال وسى قىتايدا تارالدى ەمەس پە دەيدى ولار.
-اسەت اسكەر ۇلى, ءسىز بۇعان نە دەيسىز؟
Egemen.kz ءتىلشىسى تاراپىنان اقتوبە وبلىستىق دەنساۋلىق ساقتاۋ باسقارماسىنىڭ باسشىسى ءا.ءا.قاليەۆكە وسىنداي ساۋال قويىلدى. ونىڭ بۇعان قايتارعان جاۋابى تومەندەگىدەي بولىپ شىقتى.
-شەت ەلدەن ەلىمىزگە كەلەتىن نەمەسە ءوز رەسپۋبليكامىزدان شەت ەلگە جونەلتىلەتىن تاۋارلاردىڭ ءبارى ساپا سەرتيفيكاتى بويىنشا رەسىمدەلەدى. قازىرگى كەزدە قازاقستاننىڭ شەكاراسىنداعى ەلدىڭ سانيتارلىق-ەپيدەميولوگيالىق قىزمەتى بۇعان وتە ساق قاراپ, قاتاڭ ەكسپەرتيزا جاساپ ءجۇر. ال جۇكتەر ارناۋلى وڭدەۋ ۇدەرىستەرى جۇرگىزىلگەن سوڭ قابىلدانادى. تەك سودان كەيىن عانا ەل اۋماعىنا ەنگىزىلەدى. سوندىقتان دا قىتايدان اقتوبەگە جەتكىزىلگەن گۋمانيتارلىق كومەكتىڭ ىشىندەگى مەديتسينالىق قۇرال-جابدىقتاردان ينفەكتسيا تارالادى دەپ تۇجىرىم جاساۋعا نەگىز جوق. وڭىردەگى دەنساۋلىق ساقتاۋ ۆەدومستۆو باسشىسىنىڭ بۇل دالەلىمەن كەلىسۋگە دە بولار. ايتسە دە ۆيرۋستىڭ كەز-كەلگەن ءتۇرى ەشقانداي شەكارا تاڭدامايتىنى نازاردان تىس قالماسا بولعانى دا.