باتىس قازاقستانداعى جەتىنشى سىرقات تا رەسەيدەن كەلدى

«باتىس قازاقستان وبلىسىندا «COVID-19» ينفەكتسياسىن جۇقتىرعان ازامات رەسەي فەدەراتسياسىندا ۆاحتا ادىسىمەن جۇمىس جاسايتىن 37 جاستاعى باتىس قازاقستان وبلىسى تۇرعىنى» دەپ حابارلادى مەملەكەتتىك كوميسسيانىڭ شۇعىل شتابى.

سىرقات رەسەي فەدەراتسياسىنىڭ ساراتوۆ وبلىسىمەن شەكاراداعى «تاسقالا» اۆتووتكەلىندەگى سانيتارلىق-كارانتيندىك بەكەتتە انىقتالدى. شەكاراداعى ەپيدەميولوگ ماماندار قاشىقتىق تەرمومەتريا جانە ساۋالناما جۇرگىزۋ كەزىندە-اق ازاماتتىڭ جوتەلىپ, تۇماۋراتىپ تۇرعانىن بايقاعان. سول جەردە بىردەن وقشاۋلانىپ, جەدەل جاردەم كولىگى شاقىرىلدى. پروۆيزورلىق ستاتسيونارعا جەتكىزىپ, كوروناۆيرۋس جۇقپاسىنا تالداۋ جاساعان كەزدە ونىڭ بويىنان COVID-19 دياگنوزى ناقتىلاندى. قازىر ناۋقاس وبلىستىق جۇقپالى اۋرۋلار اۋرۋحاناسىندا جەكە بوكسقا جاتقىزىلدى.

ناۋقاستارمەن قارىم-قاتىناستا بولعان ادامدار انىقتالىپ, ءبارى دە مەديتسينالىق باقىلاۋعا الىنعان.

12 ءساۋىر كۇنگى تاڭەرتەڭگى مالىمەت بويىنشا وڭىردە COVID-19 كوروناۆيرۋس ينفەكتسياسىنا شالدىققان 7 ادام وبلىستىق جۇقپالى اۋرۋلار اۋرۋحاناسىنا ەم الىپ جاتىر.

باتىس قازاقستان