اينالاڭا جاقسىلىق جاساۋ, مەيىرىم-شاپاعاتىڭدى توگۋ دەگەن سوزدەردىڭ ماعىناسى مىندەتتى تۇردە بىرەۋگە قارجىلاي كومەك قولىن سوزۋ, تۇرمىستىق دەڭگەيى تومەن وتباسىلارعا جاردەمدەسۋ سياقتى تەك ماتەريالدىق جاعدايعا قاتىستى ايتىلاتىن يگىلىكتى ىسپەن شەكتەلمەيدى, سونىمەن قاتار ول – كىسىنىڭ كوڭىل-كۇيىنە شۋاق سەبەلەپ, جان-دۇنيەسىنە اسەر ەتەتىن رۋحاني بايلىقپەن دە تىعىز بايلانىستى اۋقىمى كەڭ ايشىقتى ۇعىم.
وسىندايدا كاكىمبەك سالىقوۆتىڭ بار قازاققا ايگىلى ء«بىر اۋىز ءسوز قاسىرەتتى تيادى, ءبىر اۋىز ءسوز ايىقپاس دەرت جيادى» دەپ كەلەتىن ولەڭ جولدارى ويعا ورالادى. ءمان بەرسەك, ءبىر اۋىز جىلى ءسوزدىڭ ءوزى جىگەرى مۇقالعان جانعا دەمەۋ, اياعىنان تىك تۇرىپ كەتۋىنە وراسان زور مەدەت ەكەن. كىسىنىڭ قايعى-قاسىرەتىن جەڭىلدەتىپ, جاقسىلىق جاساۋعا قۇلشىنىپ تۇراتىن, جۇرەگىنىڭ شىراعى بار جانداردىڭ ءاربىر جاقسى ارەكەتىن الدەنەنى سەبەپ ەتپەي-اق, جان قالاۋىمەن ادال اتقارۋعا دايىن تۇراتىنى ەرتەڭگى تاڭىمىزدىڭ جارقىراپ اتارىنا سەكەمسىز سەندىرەدى. ء وزىڭدى قورشاعان الەمگە, قوعامعا پايداڭدى تيگىزۋ دەگەندى كۇندەلىكتى ءومىرىنىڭ باستى قاعيداتىنا اينالدىرعان مۇنداي تۇلعالار بىرەۋدى قۋانتپاي, شاتتىققا بولەمەي تۇرا المايدى.
نۇر-سۇلتان قالاسىنىڭ تۇرعىنى نيەتحان باتىرحان ۇلى ەسىمدى ازاماتتىڭ كارانتيندە قاراپ جاتپاي, كارتينا سالعانىن الەۋمەتتىك جەلىدەن كوزىمىز شالىپ قالدى. ارينە شىعارماشىلىق ادامىنىڭ قيال ۇشىنداعى سان-ساپات بەينەلەردى ۇيىندە جاتىپ-اق تىرىلتە بەرۋى زاڭدى قۇبىلىس بولۋى مۇمكىن. بىراق ءبىزدىڭ اڭگىمەگە ارقاۋ ەتىپ وتىرعان كەيىپكەرىمىزدىڭ ونەرى وزگە ارىپتەستەرىنە قاراعاندا جۇرتشىلىققا وزگەشە اسەر قالدىرادى. «اكسيوما» تۇرعىن ءۇي كەشەنىندە تۇراتىن اۋەسقوي سۋرەتشى ءوز پاتەرى ورنالاسقان توعىزىنشى قاباتتىڭ كىرەبەرىس قابىرعاسىنا بارەلەف ۇلگىسىمەن «مەنىڭ اۋلام» كومپوزيتسياسىن سالدى.
–اۋىلداعى الما باعىنا دەگەن ساعىنىشتان وسى يدەيا تۋدى. ۋىلجىپ پىسكەن جەمىستىڭ ءدامى ءتىل ۇيىرەتىن. ءبىز ونى وتە جاقسى كورەتىنبىز, المانىڭ يىسىنەن, ءدامى مەن شىرىنىنان ءلاززات الاتىنبىز. سوندىقتان مەن وسى جەمىس اعاشىنىڭ سۋرەتى ارقىلى كورشىلەرىمە قۋانىش سىيلاعىم كەلدى. ويتكەنى ماۋەلى اعاشقا قاراعان ادامنىڭ جانى كوكتەمنىڭ كۇنىندەي جادىراپ, مەيىرىم-شاپاعاتقا بولەنەدى, گۇلگە ورانعان اۋىلداعى الما باعىن ارالاپ جۇرگەندەي كەرەمەت كۇي كەشەدى, ۋاقىت كەڭىستىگىنە ساياحات جاسايدى. ۇلىم ءالىبي ەكەۋمىز ەكى جاقتاپ قولعا العان ءىستى از ۋاقىتتا اياقتاپ شىقتىق. الايدا مۇنىمەن توقتاپ قالمايمىز. قازىر تاعى ءبىر تىڭ تۋىندىنى سالۋعا كىرىستىم, – دەيدى اۆتور بىزبەن اڭگىمەسىندە.
قابىرعاعا العاش رەت سۋرەت سالعان قىلقالام يەسىنىڭ كىرەبەرىسكە ىلىنگەن باسقا تۋىندىلارى دا تىلسىم سىرىمەن, بوياۋ-بەدەرىمەن ەرەكشە كوز تارتادى. الۋان ايشىقتى پەيزاجدار تابيعات-انا بولمىسىنان قاپىسىز سىر شەرتەدى. ماسەلە تابيعاتقا قاراپ وتىرىپ, اينىتپاي سۋرەت سالۋدا ەمەس, ونىڭ ماعىناسىن اشىپ, وي مەن سەزىمدى, كوڭىل-كۇيدى بەرە بىلۋدە دەسەك, تاۋ مەن دالا تابيعاتىن سيپاتتايتىن تۋىندىلاردان سۋرەتشىنىڭ ءومىر اعىسىن وزگەشە ورنەكتەيتىن قولتاڭباسىن اڭعارۋ قيىن ەمەس. مۇنى ول كەلەشەكتە تۋعان جەردىڭ باي تابيعاتىن, كەڭ بايتاق قازاقستاننىڭ تاۋلى, سۋلى, ءشولدى, ورماندى القاپتارىن قاتار قامتيتىن «مەنىڭ ەلىم» اتتى سەريالى توپتاماعا اينالدىرعىسى كەلەتىنىن تىلگە تيەك ەتتى. ءار شىعارمانىڭ دۇنيەگە كەلۋى, كوڭىل-كۇيگە اسەرى قايتالانبايدى. مىسالى, تۋعان جەرگە ساعىنىشتان تۋعان «وزەن» كارتيناسى ءوزى تۋىپ-وسكەن شۋ وزەنى بويىنداعى كەڭ جايلاۋدىڭ تىنىس-تىرشىلىگىن بەدەرلەسە, «تاۋ», ء«شول دالادا» اتتى كارتينالارى تۋعان ولكەمىزدىڭ باي تابيعاتىنا بايىپپەن ەرتەدى.
اۆتور تۋرالى از-كەم ماعلۇمات بەرە كەتسەك, نيەتحان كەنجەبەكوۆ جەزقازعان پەدينستيتۋتىنىڭ سىزۋ جانە بەينەلەۋ ونەرى فاكۋلتەتىن وقىپ بىتىرگەن. ەڭبەك جولىن مەكتەپتە مۇعالىم بولىپ باستاعان, كەيىن ىشكى ىستەر سالاسىندا ابىرويلى قىزمەت اتقارعان. زەينەت دەمالىسىنا 2008 جىلى شىققان ازامات: «قازىر قول قۋسىرىپ قاراپ جاتاتىن زامان ەمەس, ءوزىمنىڭ جەكە بيزنەسىم بار, نۇر-سۇلتان قالاسىندا پاتەرلەردى جالعا وتكىزۋمەن اينالىسامىن. قولىم قالت ەتكەندە سۋرەت سالامىن, ولەڭ جازامىن. بۇل ونەر ماعان انامنىڭ اق سۇتىمەن دارىعان بولسا كەرەك. ويتكەنى انام قازاقتىڭ كيىز ءۇيىنىڭ اشەكەي-بۇيىمدارىن ءمىنسىز توقيتىن قولى گۇل, ناعىز شەبەر كىسى ەدى» دەيدى نيەتحان باتىرحان ۇلى.
«جاقسى كورشى تاپقانىڭ – كوپ ولجاعا باتقانىڭ» دەگەن قاناتتى ءسوزدى اتام قازاق بەكەر ايتقان با؟ كارانتيندە كورشى-قولاڭىنا الما اعاشىن سىيلاپ, تاماشا تارتۋىمەن قۋانتقان وسى ازاماتتىڭ ءىس-ارەكەتى تاستى جارىپ شىققان تاۋ گ ۇلىندەي جان باۋرايدى. بۇلتتىڭ اراسىنان جىلتىراعان جارىق ساۋلەگە ۇقسايدى.
سۋرەتتەردە: نيەتحان باتىرحان ۇلىنىڭ پەيزاجدارى