اتىراۋداعى نازارباەۆ زياتكەرلىك مەكتەبىنىڭ 12-سىنىپ وقۋشىلارى دۋلات ۋاليەۆ, اينۇر حاميتوۆا جانە دامير تاجيەۆ نازارباەۆ ۋنيۆەرسيتەتىنىڭ وقۋ گرانتىن يەلەندى. ولار اتالعان وقۋ ورنىنىڭ ينجەنەريا جانە تسيفرلىق عىلىمدار فاكۋلتەتىن تاڭداپتى. دارىندى وقۋشىلار بۇل مۇمكىندىككە حالىقارالىق اكادەميالىق باعالاۋ ەمتيحانىنىڭ (SAT) قورىتىندىسىمەن يە بولعان.
- مەن جوعارى سىنىپتاردا IELTS, SAT سەكىلدى حالىقارالىق ەمتيحاندارعا دايىندالدىم. قوسىمشا ادەبيەتتەردى ىزدەستىرىپ, شەتەلدىك ءبىلىم رەسۋرستارىندا سىناقتار تاپسىردىم. نازارباەۆ ۋنيۆەرسيتەتىندەگى گرانتقا يە بولۋىمىزعا مەكتەپتەگى ۇستازدارىمنىڭ ۇلەسى زور. ويتكەنى, ولار مەكتەپتەگى پاندەردى تەرەڭ مەڭگەرۋگە كوپ ەڭبەك ءسىڭىردى. ەلىمىزدەگى جەتەكشى ۋنيۆەرسيتەتتىڭ گرانتىن ۇتىپ الۋمىز – نازارباەۆ زياتكەرلىك مەكتەپتەرىندەگى 12 جىلدىق ءبىلىم بەرۋ جۇيەسى مەن مەكتەپتەگى كاسىبي باعدار جۇمىستارىنىڭ ناتيجەسى, - دەيدى اينۇر حاميتوۆا.
جۇماسات عازيز