قىتاي عالىمدارى كورناۆيرۋسپەن اۋىرعاندارعا قان پلازماسىن قۇيۋدىڭ جاقسى ناتيجە كورسەتكەنىن جاريا ەتتى. ولار ۋحاننىڭ ءۇش اۋرۋحاناسىندا تىنىس الۋى قيىنداپ, اۋىر حالدە جاتقان ورتا جاستاعى ون ناۋقاسقا دونورلىق قان پلازماسى قۇيىلعاندىعىن ايتادى. دونور قانى ۆيرۋسپەن اۋىرعاننان كەيىنگى ءۇشىنشى اپتا جانە اۋرۋحانادان شىققان ءتورتىنشى كۇن ىشىندە الىنعان.
قان پلازماسى قۇيىلعان ناۋقاستار رەانيماتسيا مەن ينتەنسيۆتى تەراپيا بولىمىندە تىنىس الۋ اپپاراتىنا قوسىلعان. بارلىعىنا بىردەي 200 مل دونور پلازماسى قۇيىلعان. ولاردىڭ جاعدايى پلازما قۇيىلعاننان كەيىن ءۇش كۇن ىشىندە جاقسى ناتيجە كورسەتە باستاعان. قان قۇرامىنداعى ليمفوتسيتتەر كوبەيىپ, باۋىر جۇمىسى جاقسارعان ءارى وكپە قابىنۋى باسەڭدەگەن. ءبىر ناۋقاس ەكى كۇننەن كەيىن تىنىس الۋ اپپاراتىنان بوساتىلعان. ناتيجەسىندە ون ناۋقاس تا جازىلىپ شىققان. قورىتىندىسىندا يممۋندىق جۇيە انتيەلالارمەن جەڭىلدەگەن. ماماندار قان پلازماسىن قۇيۋدىڭ COVID-19 ۆيرۋسىنا شالدىققانداردى ەمدەۋدەگى قاۋىپسىز جول ەكەنىن ايتادى.
قىتاي ماماندارىنان كەيىن فرانتسيا دارىگەرلەرى دە وسى ءادىستى قولدانا باستاعان. قىتاي ماماندارى پلازمانى جاقىندا عانا ەمدەلىپ شىققان ناۋقاستان الۋ قاجەتتىگىن ايتادى. ەمدەۋدىڭ بۇل ءادىسى اۋىرعانىنا ەكى اپتادان اسپاعان ناۋقاستاردا جاقسى نىتيجە بەرەدى. ال ون ءتورت كۇننەن اسىپ كەتكەن جاعدايدا اسەرى باياۋ بولعان. ساراپشىلار كوروناۆيرۋسقا قارسى ۆاكتسينا تابىلماي تۇرعان كەزەڭدە بۇل ءادىس اۋىر حالدەگى ناۋقاستاردى قولداۋ ءۇشىن قاجەت, دەيدى.