مەملەكەت باسشىسى ءساۋىر ايىنىڭ سوڭىنا دەيىن كارانتين رەجيمىنىڭ مەرزىمىن سوزۋدى تاپسىردى. بۇل – ەلىمىزدە كوروناۆيرۋسپەن كۇرەستىڭ جاڭا دەڭگەيگە شىعىپ, اتالعان ىندەتكە قارسى مايداننىڭ كەڭ اۋقىمدا جۇرگىزىلەتىنىن اڭعارتسا كەرەك.
بۇل ىستە قاراعاندى وبلىسىنىڭ دا قوسار ۇلەسى قوماقتى بولۋى كەرەك. وڭىردە اتى جامان اۋرۋدىڭ كوزىن جويۋ ماقساتىندا كوپتەگەن شارۋالاردىڭ قولعا الىنعانىن ايتا كەتكەن ءجون.
اۋىرعاندار سانى الپىستان استى
بۇگىن قاراعاندى وبلىسىندا تاعى ءبىر ادامنىڭ COVID-19 جۇقتىرعانى بەلگىلى بولدى. بۇل ناۋقاس وكپەسىنە سۋىق ءتيىپ, پۋلمونولوگيالىق گوسپيتالعا جاتقىزىلعان ەكەن. كەيىن زەرتحانالىق نەگىزدە ونىڭ قان تالداۋىنان كوروناۆيرۋس ينفەكتسياسىنىڭ بەلگىسى انىقتالعان. ناۋقاس بۇرىن COVID-19 جۇقتىرعاندارمەن بايلانىستا بولماعان.
قازىرگى تاڭدا وبلىستا كوروناۆيرۋس جۇقتىرعاندار ىندەتكە قارسى قاۋىپسىزدىكتىڭ قاجەتتى شارالارى ساقتالا وتىرىلىپ, ارنايى بوكستارعا وقشاۋلاندىرىلعان. ولار ءتيىستى ەم-دومدى الىپ جاتىر.
بۇگىنگى كۇندە قاراعاندى وبلىسىندا كوروناۆيرۋس ينفەكتسياسىن جۇقتىرعانداردىڭ سانى 62-گە جەتتى. ءبىر ادام وسى دەرتتەن قايتىس بولدى. ءۇي كارانتينىندە 1 638 ادام وتىر. تاۋلىك بويى باقىلاۋعا 686 تۇرعىن الىنعان.
دارىگەرلەر دەمەۋدەن تارىقپاسىن!
قاراعاندى وبلىسىندا كوروناۆيرۋسپەن كۇرەستە الدىڭعى شەپتە جۇرگەن جۇقپالى پروۆيزورلىق جانە كارانتيندىك گوسپيتالداردىڭ, جەدەل مەديتسينالىق كومەك قىزمەتىنىڭ ماماندارى جانە كارانتيندىك بلوك-بەكەتتەردەگى كەزەكشى دارىگەرلەر ۇستەمە اقى الدى.
ناقتى ايتقاندا, 1349 مەديتسينالىق قىزمەتكەرگە رەسپۋبليكالىق بيۋدجەتتەن ۇستەمە تولەندى. بۇل ماقساتقا 139 ميلليون تەڭگە بولىنگەن بولاتىن. سىياقى مولشەرى ساعاتتاردىڭ سانىنا جانە قىزمەتكەردىڭ بىلىكتىلىگىنە بايلانىستى ءبولىندى.
سونىمەن قاتار, وبلىستىق بيۋدجەتتەن بولىنگەن 197 ميلليون تەڭگە ەسەبىنەن 1677 مەديتسينالىق قىزمەتكەرگە ءبىر ەڭبەكاقى كولەمىندە قوسىمشا سىياقى تولەندى.
جالپى, ەلىمىز بويىنشا مۇنداي ۇستەمەاقىنى 30 مىڭنان استام مەديتسينا قىزمەتكەرى الادى.
شاحتينسكىدە كارانتين كۇشەيتىلەدى
قاراعاندىعا سەرىكتەس قالا شاحتينسكىدە 12 ءساۋىر كۇنى ساعات 00.00-دەن باستاپ كارانتين كۇشەيتىلىپ, قالاعا كىرۋگە جانە شىعۋعا تىيىم سالىناتىن بولدى. قالادا جەكە اۆتوكولىكتەرمەن جۇرۋگە بولمايدى, قوعامدىق كولىك قوزعالىسى ۋاقىتشا توقتاتىلا تۇرادى. بۇل تۋرالى وبلىستىڭ باس مەملەكەتتىك سانيتارلىق دارىگەرى قانات اسقاروۆ مالىمدەدى.
– كوروناۆيرۋستىڭ تارالۋىنا جول بەرمەۋ جانە تۇرعىنداردى قورعاۋ ماقساتىندا قوسىمشا شارالاردى قولعا الۋ قاجەت بولدى. شاحتينسكىدە سىرقاتتانۋشىلىق كورسەتكىشى 10 مىڭ تۇرعىنعا شاققاندا 1 ادامنان كەلەتىن دەڭگەيدەن استى. وسىنى ەسكەرە وتىرىپ, قالانىڭ كارانتيندىك ايماعىنىڭ بىرىڭعاي پەريمەترى بەلگىلەنەتىن بولادى جانە جەكە كولىكتىڭ قوزعالىسى تولىق توقتاتىلادى, – دەدى ول.
ءساۋىردىڭ 11-نەن 12-نە قاراعان ءتۇنى كارانتين كۇشەيتىلەتىن شاحتينسكىدە بەلگىلەنگەن پەريمەتر بويىنشا بەس بلوك-بەكەت ورناتىلادى. قالادا لومباردتار مەن ايىرباستاۋ پۋنكتتەرىنىڭ قىزمەتى ۋاقىتشا توقتاتىلادى.
قاراعاندى وبلىسى