نايدجەل دوۋس «بارىسقا» ورالعىسى كەلەدى

بەيرەسمي مالىمەتتەرگە سەنسەك, دوۋستىڭ كەلىسىمشارتتى ودان ءارى ۇزارتۋعا اسا قۇلقى جوق كورىنەدى. ونىڭ ماقساتى – «بارىسقا» قايتا ورالۋ. 35 جاستاعى كانادانىڭ ۆيننيپەگ قالاسىنىڭ تۋماسى 2011-2018 جىلدار ارالىعىندا ەلوردالىق كوماندا ساپىندا وينادى. سول كەزدەرى 415 رەت مۇز ايدىنىنا شىعىپ, 376 ۇپاي جيدى. تارقاتىپ ايتساق, 217 گول سوعىپ, 159 رەت ناتيجەلى پاس بەردى. كەزىندە ول كوماندانىڭ كاپيتانى دا بولدى. التى رەت قۇرلىقتىق حوككەي ليگاسىنىڭ (قحل) «جۇلدىزدار ماتچىندا» وينادى.

نايدجەل دوۋس 2004 جانە 2005 جىلدارى كانادانىڭ جاستار قۇراماسى ساپىندا الەم بىرىنشىلىگىندە قاتىستى. ايتۋلى جارىستىڭ العاشقىسىندا كۇمىس السا, ەكىنشىسىندە باس جۇلدەنى ولجالادى. ەڭ ۇزدىك شابۋىلشى جانە سۇرمەرگەن اتاعىن يەلەندى. 2016 جىلى قازاقستاننىڭ ازاماتتىعىن الىپ, سول كەزدەن بەرى ءبىزدىڭ ەلدىڭ ۇلتتىق قۇراماسىنىڭ ساپىندا ونەر كورسەتۋدە.