كوكشەتاۋدا كوروناۆيرۋس ىندەتىنە قارسى شارالار كۇشەيە ءتۇستى. بۇل ماڭىزدى ىسكە ەڭبەك ۇجىمدارى, قالا تۇرعىندارى جانە ەرىكتىلەر بەلسەنە اتسالىسۋدا.
قازاقستان رەسپۋبليكاسىنىڭ ءىىم قاراستى كوكشەتاۋ تەحنيكالىق ينستيتۋتىنىڭ وقىتۋشىلارى مەن قىزمەتكەرلەرى ارنايى جوسپار قۇرىپ, ەكى اپتادان بەرى تۇرعىن ءۇي اۋلالارىندا, ساۋدا ورىندارىندا, كوشە بويلارى مەن ايالدامالاردا, باسقا دا كوپشىلىك ورىندارىندا دەزينفەكتسيالىق جۇمىستاردى جۇرگىزۋدە.
ءبىز وبلىستىق كوپبەيىندى اۋرۋحانا اۋماعىندا زالالسىزداندىرۋ ىسىمەن اينالىسىپ جاتقان اق كومبينيزوندى جيىرما كىسىنىڭ ورتاسىندا جۇرگەن ينستيتۋت باستىعى, ازاماتتىق قورعاۋ پولكوۆنيگى سىرىم ءشارىپحانوۆتى سوزگە تارتتىق.
–بۇل ءبىزدىڭ ازاماتتىق جانە كاسىبي تۇرعىداعى پارىزىمىز,–دەيدى ول. كارانتيندىك رەجيمگە بايلانىستى, ەلىمىزدىڭ بارلىق وڭىرىنەن كەلگەن كۋرسانتتار ۇيلەرىنە قايتارىلىپ, ونلاين-دارىستەر الۋدا. سوندىقتان, جوعارى باسشىلىقتىڭ كەلىسىمىمەن, ينستيتۋتتا كەزەكشىلىكتەن جانە ساباقتان بوساتىلعان وفيتسەرلەر مەن سەرجانتتاردان ىرىكتەلگەن ەرىكتى جاساق قۇرىلدى. ەكى زۆەنوعا بولىنگەن قۇرىلىمداردى پودپولكوۆنيك ازات قۇسايىنوۆ پەن مايور سۋلتان اريفدجانوۆ باسقارادى.
بۇل باستامانى كوكشەتاۋ اكىمدىگى قولداپ, قورعانىس كيىمدەرىن, دەزينفەكتسيالىق زاتتار مەن ارنايى قۇرالدار ءبولدى. جۇمىس بارىسىنداعىلار يىققا اساتىن ءبىر قۇرالدىڭ ءدارى-دارمەگى 700 شارشى مەترگە جەتەتىنىن جانە 200 مەتر سايىن تولىقتىرىلىپ وتىرىلاتىنىن ايتادى. كەشەگى كۇنى ينستيتۋت ەرىكتىلەرى 42 مىڭ شارشى مەتر اۋماقتى زالالسىزداندىرعان. مۇنىڭ ءوزى 10 شاشىراتقىش قۇرالدىڭ جۇكتەمەسى تولىعىمەن اتقارىلعانىن بىلدىرەدى.
ينستيتۋتتىڭ ازاماتتىق قورعانىس جانە اسكەري دايىندىق كافەدراسى باستىعىنىڭ مىندەتىن اتقارۋشى سۇلتان اريفجانوۆتان تومەندەگىدەي مالىمەتتەردى الدىق: «جۇمىس كەستەسى بويىنشا ءبىز 2 ساۋىردەن باستاپ بەس كۇن قاتارىنان «ورتالىق», «التىن پلازا», «جىبەك جولى» بازارلارىندا, ن.نازارباەۆ, ابىلاي حان داڭعىلدارى مەن اقان سەرى, ە.اۋەلبەكوۆ كوشەلەرىنىڭ بويىنداعى نىسانداردا, ناۋان حازىرەت اتىنداعى ورتالىق مەشىت, ساۋدا ورتالىقتارىندا, ازىق-ت ۇلىك قويمالارىندا, سپورتتىق نىسانداردا, مەكتەپتەر اۋماعىندا «دياحلور قوسپاسى» سۇيىعىمەن وڭدەۋمەن اينالىستىق. وسى ەسەپتى مەرزىمدە 14,5 توننادان استام ءدارى جۇمسالىپ, 249,3 مىڭ شارشى مەتر الاڭ تالاپقا ساي وڭدەلدى» دەيدى س.اريفدجانوۆ.
ينستيتۋت ەرىكتىلەرى بۇل جۇمىس جالعاسا بەرەتىنىن جانە كەز كەلگەن ۋاقىتتا العى شەپتەن كورىنۋگە دايىن ەكەندىكتىرىن ءبىلدىردى.
كوكشەتاۋ قالاسى