وتكەن جىلى قازاقستان رەسپۋبليكاسىنىڭ ءبىلىم جانە عىلىم مينيسترلىگى 2020–2022 جىلدارعا ارنالعان عىلىمي جانە عىلىمي-تەحنيكالىق جوبالار اياسىندا جاس عالىمداردى گرانتتىق قارجىلاندىرۋ ءۇشىن كونكۋرس جاريالاعان ەدى. بۇل بايقاۋ – 40 جاسقا تولماعان جاس عالىمداردىڭ عىلىمي-زەرتتەۋلەرىن ىنتالاندىرۋدى كوزدەيدى.
اتالمىش كونكۋرسقا وزگەلەرمەن قاتار ءال-فارابي اتىنداعى قازاق ۇلتتىق ۋنيۆەرسيتەتى حيميا جانە حيميالىق تەحنولوگيا فاكۋلتەتى ورگانيكالىق زاتتار, تابيعي قوسىلىستار جانە پوليمەرلەر حيمياسى مەن تەحنولوگياسى كافەدراسىنىڭ جاس عالىمدارى دا وزدەرىنىڭ عىلىمي جوبالارىن جىبەرگەن. جاقىندا كونكۋرس ناتيجەسى شىعىپ, كافەدراننىڭ ءتورت بىردەي جاس عالىمى –حيميا عىلىمىنىڭ كانديداتتارى عاليا يرمۋحامەتوۆا, گۇلفايرۋز قايرالاپوۆا, PhD زارينا كەڭەسوۆا مەن PhD گۇلناز سەيتىموۆا گرانتتارعا يە بولدى.
عاليا سەرىكبايقىزىنىڭ عىلىمي جۇمىسى «گيدروفيلدى پوليمەرلەر نەگىزىندە جاڭا ۆاگينالدىق دارىلىك زاتتار الۋدىڭ تەحنولوگياسىن ازىرلەۋ»دەپ اتالادى. بۇل ىزدەنىس – جوعارى ءتيىمدى ۆاگينالدى دارىلىك تۇرلەر رەتىندە پايدالانۋ ءۇشىن گيدروفيلدى بيوسىيىسىمدى پوليمەرلەر نەگىزىندە جاڭا پوليمەرلىك ماتەريالداردى الۋ تەحنولوگياسىن ازىرلەۋدى ماقسات تۇتادى.
گۇلفايرۋز جۇمابايقىزىنىڭ عىلىمي جۇمىسى «مەتالدارمەن جانە بەتتىك بەلسەندى زاتتارمەن لاستانعان سۋدى تازارتۋ ءۇشىن ەكولوگيالىق جاعىنان ماڭىزدى ورگانو-مينەرالدى سوربتسيالىق ماتەريالداردى جاساۋ» ىزدەنىستەرىنە باعىتتالعان. جۇمىستىڭ ماقساتى – اۋىر مەتالدار يوندارىنىڭ سوربەنتتەرى جانە بەتتىك-بەلسەندى زاتتار رەتىندە پايدالانۋ ءۇشىن وتاندىق پوليمەرلەر مەن سازدى مينەرالداردىڭ نەگىزىندە جاڭا كومپوزيتسيالىق ماتەريالداردى ازىرلەۋ.
زارينا انۋارقىزى «تابيعي وسىمدىك شيكىزاتىنان باسقارىلاتىن قۇندى كومپونەنتتى ەكستراكتسيالاۋ ادىستەرىن ازىرلەۋ» باعىتىندا عىلىمي ىزدەنىستەرگە بارىپ وتىر. جوبا ميكروتولقىندى ساۋلەلەنۋ كومەگىمەن تابيعي وسىمدىك شيكىزاتىنان قۇندى كومپونەنتتەردى ەكستراكتسيالاۋدىڭ جاڭا پەرسپەكتيۆالىق ءادىسىن ازىرلەۋگە جانە كونتسەنتراتسيا مەن تەمپەراتۋرانىڭ ايقىن گراديەنتتىك ورىستەرىن قۇرۋعا, سونداي-اق ۇسىنىلعان ءتاسىلدى ىسكە اسىراتىن جاڭا ۇلگىدەگى ەكستراكتورلاردى قۇرۋعا باعىتتالعان.
گۇلناز ابساتتارقىزىنىڭ عىلىمي جۇمىسى قازاقستانداعى كەيبىر وسىمدىك تۇرلەرىنەن الىنعان تابيعي قوسىلىستاردى حيميالىق زەرتتەۋ, ءبولۋ, الۋ, تازارتۋ جانە ولاردىڭ بيولوگيالىق بەلسەندىلىگىن انىقتاۋ ماقساتىندا جۇرگىزىلگەن. «قازاقستاننىڭ كەيبىر وسىمدىكتەر تۇرلەرىنەن الىنعان تابيعي قوسىلىستاردى حيميالىق زەرتتەۋ جانە ولاردىڭ بەلسەندىلىگى» دەپ اتالادى.
الماتى