تۇڭعىش پرەزيدەنت – ەلباسى نۇرسۇلتان نازارباەۆ «بىرلەسە بىلگەن ەل ءبارىن جەڭەدى» اتتى ماقالاسىندا عۇلاما ابايدىڭ, باتىر بابامىز باۋىرجان مومىش ۇلىنىڭ, ۇلت ۇيتقىسى, جۇرت بىرلىگىنىڭ التىن قازىعى بولعان دارا دانىشپاندارىمىز – ايتەكە ءبيدىڭ, قاز داۋىستى قازىبەك بي مەن تولە ءبيدىڭ دانالىق سوزدەرىن كەلتىرە وتىرىپ, حالىقتى وسىنداي قيىن كەزدە سابىرلىق ساقتاپ, بىرلىكتە بولۋعا ۇندەدى. بۇل تۋرالى مادەنيەت جانە سپورت مينيسترى اقتوتى رايىمقۇلوۆا Facebook پاراقشاسىندا جازدى.
«ەلباسى ءوز ماقالاسىندا عۇلاما ابايدىڭ, باتىر بابامىز باۋىرجان مومىش ۇلىنىڭ, ۇلت ۇيتقىسى, جۇرت بىرلىگىنىڭ التىن قازىعى بولعان دارا دانىشپاندارىمىز – ايتەكە ءبيدىڭ, قاز داۋىستى قازىبەك بي مەن تولە ءبيدىڭ دانالىق سوزدەرىن كەلتىرە وتىرىپ, حالىقتى وسىنداي قيىن كەزدە سابىرلىق ساقتاپ, بىرلىكتە بولۋعا ۇندەدى. بۇل ماقالادا التى قۇرلىقتى الەككە سالعان, مايدانسىز جاۋداي جاعادان العان قاسىرەتتى دەرتكە ىزگىلىكپەن, شىدامدىلىقپەن, اۋىزبىرشىلىكپەن, ادامگەرشىلىك ءىس-ارەكەتپەن جۇدىرىقتاي جۇمىلۋعا, ءبىر بىلەك, اق تىلەككە ۇيىسۋعا شاقىردى.
حالقىمىزدىڭ وتكەن عاسىرداعى ومىرىنە نازار سالىپ, كوز جۇگىرتەتىن بولساق, بۇدان دا قيىن, بۇدان دا ۇرەيلى ساتتەردى باسىنان وتكىزگەنىن, تالاي قىپ-قىزىل قىرعىننان, قۋعىن-سۇرگىننەن, اشارشىلىقتان, سوعىستان امان شىققانىن تاريح بەتتەرىنەن وقىعانبىز. سول قيىن ساتتەردى الدىڭعى اعا ۇرپاق بىلەدى, كوز الدىنان وتكىزدى. سىن ساعاتتان الىپ شىققان بابالارىمىزدىڭ بەرەكە-بىرلىگى بولاتىن. وسى جولعى جايسىزدىق پەن جايىلعان دەرتتىڭ قىسپاعىنان دا مەملەكەتتىڭ كۇشى, حالىقتىڭ بىرلىگىنىڭ ارقاسىندا قۇتىلىپ شىعاتىنىمىزعا سەنەيىك.
ەلباسىمىز وسىنداي اۋىر كەزەڭدە بارلىق قازاقستاندىقتاردى ەل پرەزيدەنتى قاسىم-جومارت توقاەۆ پەن ۇكىمەت تاراپىنان ىسكە اسىرىلىپ جاتقان شۇعىل شارالاردى قولداۋعا شاقىردى. بۇل تىعىرىقتان شىعۋعا مەملەكەت بار كۇشتى ىسكە قوسقانىن, بىردە ءبىر كومەككە مۇقتاج جان نازاردان تىس قالمايتىنىن پرەزيدەنت قاسىم-جومارت توقاەۆ وتكەن اپتادا حالىققا مالىمدەمەسىندە ايتىپ, داعدارىستان شىعۋ جوسپارى قابىلداندى. وسى جوسپاردىڭ ىسكە اسۋىنا بار كۇش-جىگەرىمىزدى سالىپ, ءبىلىم مەن بىلىكتىلىگىمىزدى تانىتىپ, جەدەل ءارى رەت-رەتىمەن جۇزەگە اسىرۋ ءبىزدىڭ مەملەكەتتىك قىزمەتكەر رەتىندەگى مىندەتىمىز. پاندەميا مەن جاھاندىق ەكونوميكاداعى قۇبىلىستار قوس بۇيىردەن قىسقان تۇستا ورتاق ماقساتقا جۇمىلۋدىڭ ۇلگىسىن كورسەتىپ, حالىقتىڭ جانىندا بولىپ, اقىل-كەڭەسىن ايتىپ جاتقان ەلباسىنا, بىرلىككە شاقىرعان اقىن-جازۋشىلارعا, اسىرەسە الدىڭعى تولقىن ابزال اعالارعا, اتالى ءسوزىن, باتالى تىلەگىن ارناعان بارشا قازاقستان حالقىنا ۇجىمنىڭ اتىنان العىسىمىزدى جەتكىزگىم كەلەدى. سونداي-اق وسى كۇندەرى تىكەسىنەن تىك تۇرىپ, تىنباي ەڭبەك ەتىپ جۇرگەن دەنساۋلىق ساقتاۋ سالاسىنىڭ ماماندارىنا, كۇندى تۇنگە جالعاپ قىزمەت ەتىپ جاتقان اتقا مىنەر ازاماتتارعا اماندىق تىلەيمىز! ءبىز بىرگەمىز, قيىندىقتى جەڭەمىز» دەپ جازدى مينيستر.