فيليالدا 1414 call-ورتالىعىنىڭ وپەراتورلارىنان باسقا, بەينە قوڭىراۋلارعا جاۋاپ بەرەتىن ونلاين-وپەراتورلار دا بار. الماتىدا ازاماتتاردىڭ وتىنىشىنە ونلاين نەگىزدە 50 وپەراتور جاۋاپ بەرەدى.
بۇگىنگى كۇنى ەتسق كومەگىمەن بارلىق مەملەكەتتىك قىزمەتتەردىڭ 80% الۋعا بولادى. سوندىقتان ازاماتتارعا ىڭعايلى بولۋ ءۇشىن جاقىندا ەلەكتروندىق تسيفرلىق قولتاڭبانى (ەتسق) ونلاين الۋ سەرۆيسى ىسكە قوسىلدى. كارانتينگە بايلانىستى كوپتەگەن ازاماتتار مەملەكەتتىك قىزمەتتەردى ۇيدە الۋ ءۇشىن موبيلدىك ازاماتتار بازاسىندا تىركەلۋى نەمەسە ەتسق-سى بولۋى ءتيىس. ال تىركەلگەندە ولاردىڭ سايكەستەندىرۋ ءراسىمىن راستاۋ ءۇشىن الماتىدا 50 وپەراتور جۇمىس ىستەيدى. ەگەر ازاماتتىڭ تەلەفون ءنومىرى موبيلدىك ازاماتتار بازاسىندا تىركەلمەگەن جاعدايدا, جۇيە ونى حقكو وپەراتورىمەن بايلانىستىرىپ, ول ازاماتتى بەينەبايلانىس ارقىلى سايكەستەندىرەدى. بۇل باعىتتا جەلىگە بايلانىسقا شىققان ازامات بىرقاتار قوسىمشا سۇراقتارعا (قۇجاتتاردىڭ دەرەكتەرىن, تىركەۋ ورنىن جانە ت. ب.) جاۋاپ بەرۋى ءتيىس.
«قازىرگى كۇنى قوڭىراۋلار وتە كوپ ءتۇسىپ جاتىر. كەي كەزدە كليەنتتىڭ جۇمىسىن تولىقتاي ءوزىڭ جاساپ بەرۋگە تۋرا كەلەدى. قىزىقتى جاعدايلار دا بولىپ جاتادى. ءبىر-ەكى كۇن بۇرىن دىشىباەۆ مۇحيت دەگەن ءبىر تانىسىم ۆيدەو قوڭىراۋمەن حابارلاسىپ, ماعان ءتۇستى. مۇحيت ءوزىنىڭ اكەسىن Mgov mobile-عا تىركەگەلى جۇگىنگەن ەكەن. ول كەڭەس بەرىپ وتىرعان مەنى كورىپ تاڭدانىسىن جاسىرمادى. كامەرانىڭ الدىندا اكەسىمەن بىرگە وتىرىپ, بەينەبايلانىستا بولدىق. ءبىز ءۇشىن مۇنداي جاعدايدا تىلدەسۋ قىزىقتى بولدى. اكەسىن تىركەپ ريزا بولعان ول, كورسەتىلگەن قىزمەتكە العىسىن ءبىلدىردى», - دەيدى الاتاۋ اۋداندىق فرونت-ءوفيسىنىڭ مامانى قالامقاس ىرگەباەۆا.
تاعى ءبىر بەينەبايلانىس وپەراتورى جانسايا قاتكەنوۆا, 2016 جىلدان بەرى جەتىسۋ اۋداندىق فرونت-ءوفيسىنىڭ مامانى بولىپ جۇمىس ىستەپ كەلەدى. ەكى بالانىڭ اناسى. مەكتەپ جاسىنداعى بالالارى بۇگىندە شەلەك اۋىلىنداعى اتاسى مەن اجەسىنىڭ جانىندا, ساباقتارىن قاشىقتان وقىپ ءجۇر. ال جولداسى الماتى قالاسىنىڭ ءىىد-ءنىڭ اعا تەرگەۋشىسى. كارانتين كەزىندە ول دا كۇشەيتىلگەن رەجيمدە جۇمىس ىستەۋدە. جانسايا ءۇي رەجيمىندەگى جۇمىسقا كوشكەن. ول بەينە قوڭىراۋ وپەراتورىنىڭ مىندەتتەرىنە تولىعىمەن بەيىمدەلىپ العان. سۇراعىنا جاۋاپ ىزدەپ, تەلەفون شالعان ازاماتتاردىڭ ۇدەسىنەن شىعۋعا تىرىساتىن ج.قاتكەنوۆا كۇنىنە 120-150 ءوتىنىش قابىلدايتىندىعىن ايتادى.
الماتى