ۇستىمىزدەگى جىلدىڭ 12 قىركۇيەگى مەن 4 قازانى ارالىعىندا فۋتزالدان ليتۆادا وتەتىن الەم چەمپيوناتى كەيىنگە شەگەرىلدى. بۇل جارىستا قازاقستان قۇراماسى دا باق سىنايدى.
بالتىق جاعالاۋىندا وتەتىن بايراقتى باسەكەگە 24 ەلدىڭ ۇلتتىق قۇرامالارى قاتىسۋعا ءتيىس. تارقاتىپ ايتساق, ەۋروپادان – 7, ازيادان – 5, وڭتۇستىك امەريكادان – 4, سولتۇستىك امەريكادان – 4, افريكادان – 3 جانە مۇحيت جاعالاۋىنان – 1 كوماندا. بۇل جارىسقا لاتۆيا جان-جاقتى دايارلانىپ, ۇيىمداستىرۋ ماسەلەلەرى تولىقتاي شەشىلىپ تە قويعان ەدى. بىراق كوروناۆيرۋسكە بايلانىستى بارلىق جوسپاردىڭ كۇل-تالقانى شىقتى. قازىرگى كەزدە فيفا الەمدىك دوپ دوداسىن ءسال كەيىنىرەك وتكىزۋ جاعىن قاراستىرۋدا. ال ناقتى قاي ۋاقىتتا ەكەنى بىرەر كۇننەن كەيىن بەلگىلى بولادى.
ەستەرىڭىزگە سالا كەتەيىك, قازاقستاننىڭ فۋتزالشىلارى وسىعان دەيىن الەم چەمپيوناتىنا ەكى مارتە قاتىستى. ازيا فۋتبول كونفەدەراتسياسىندا جۇرگەن كەزدە جەرلەستەرىمىز 2000 جىلى گۆاتەمالاداعى ءتۋرنيردىڭ توپتىق باسەكەسىندە ءسۇرىندى. ۋەفا-عا وتكەننەن سوڭ كورسەتكىشىمىز ءبىرشاما جاقساردى. 2016 جىلى كولۋمبيادا جالاۋى جەلبىرەگەن جارىستا ءوز توبىمىزدا ەكىنشى ورىن الىپ, پلەي-وففقا جولداما الدىق. الايدا 1/8 فينالدا داڭقتى يسپانيا قۇراماسىنا ەسە جىبەردىك.