The Real Fight with Cynthia Conte ارناسىنا سۇحبات بەرگەن بوب ارۋم ءوز باسىنان وتكەن قيىندىقتار, كاسىپقوي بوكستىڭ كوپشىلىك بىلە بەرمەيتىن قۇپيالارى, زاماننىڭ اۋمالى-توكپەلى كەزىندەگى مافيانىڭ سپورت سالاسىنا ىقپالى ەتۋى جانە تاعى باسقا قىزىقتى وقيعالار جايىندا باياندادى.
88 جاستاعى ايگىلى امەريكالىق پروموۋتەردىڭ ايتۋىنشا, كەزىندە مافيا سپورتتىڭ كوپتەگەن ءتۇرى وكىلدەرىنە ءوز ىقپالىن جۇرگىزگەنى راس. كاسىپقوي بوكستا دا وندايلار از بولماپتى. جۇزدەگەن جۋىن جۇدىرىقتى جىگىتتەر سولاردىڭ جەتەگىندە كەتتى. جەڭۋ كەرەك دەسە جەڭدى, جەڭىلۋ قاجەت دەسە جەڭىلدى. ويتكەنى, باسكە مول اقشا تىگىلەدى. وڭاي جولمەن بايۋدى كوزدەگەن قىلمىستىق ەلەمەنتتەر وسىنداي وپاسىزدىققا ءجيى باراتىن.
-سول زاماندا مافياعا ەش قاتىسى جوق جالعىز بوكسشى مۇحاممەد ءالي ەدى. ويتكەنى, داڭقتى بىلعارى قولعاپ شەبەرى «يسلام ۇلتتارى» ۇيىمنىڭ قاتارىندا بولدى. ال قىلمىس الەمىنىڭ سەركەلەرى «اعايىندىلاردان» اركەز اۋلاق جۇرۋگە تىرىساتىن. سول سەبەپتى دە مافيا مۇحاممەدكە ەش جولاعان جوق. كەيىننەن «يسلام ۇلتتارى» كۇشەيگەندە, باسبۇزارلار بوكس سالاسىنان مۇلدە الىستادى. سول سەكىلدى مافيانىڭ مۇشەلەرى مەنەن دە قايمىعاتىن. ولار بوب ارۋمدى جاسىرىن قىزمەت اتقارىپ جۇرگەن فەدەرالدى اگەنت دەپ ويلايتىن. تىپتەن, ءوزىمنىڭ قۇرداسىم ءارى وسى كاسىپتەگى باستى باسەكەلەسىم دون كينگ مىرزا ءالى دە سولاي ويلايدى, - دەپ ارۋم اقساقال قىزىقتى ءبىر اڭگىمەنىڭ تيەگىن اعىتتى.