قازاقستان قوعامىنىڭ دامۋىندا ءارتۇرلى سىن-تەگەۋرىن مەن قاتەرلەردىڭ تەجەگىش اسەرى كوپ. ەلىمىزدىڭ تۇڭعىش پرەزيدەنتى – ەلباسى نۇرسۇلتان نازارباەۆ «بىرلەسە بىلگەن ەل ءبارىن جەڭەدى» اتتى ماقالاسىندا قازاقستان حالقىنىڭ بىرلىگى مەن ۇيىمشىلدىعىنا كوپتەگەن الەۋمەتتىك-ەكونوميكالىق جانە قوعامدىق-ساياسي ۇدەرىستەردىڭ تاۋەلدى بولاتىنىن باسا ايتتى. ءيا, بۇگىنگى الەۋمەتتىك-ەكونوميكالىق قيىندىقتار اياسىندا بارشامىزدىڭ بىرىگۋىمىز قاجەت ەكەنى داۋسىز.
قاۋىپتى سيپاتتاعى كوروناۆيرۋستىڭ جايىلۋى, البەتتە, قازاقستان جانە الەم ەلدەرىنىڭ دامۋىنا تەرىس اسەرىن تيگىزەدى. بولىپ جاتقان جاھاندىق وزگەرىستەر ەكونوميكالىق, ازىق-ت ۇلىكتىك قاۋىپسىزدىكتى قامتاماسىز ەتۋ ءۇشىن اجەپتاۋىر كۇش سالۋدى قاجەت ەتەدى. وسى تۇستا مەملەكەتتىك جانە مەملەكەتتىك ەمەس ورگانداردىڭ باستى مىندەتى – ەل تۇرعىندارىنىڭ ءومىر ساپاسى مەن ەكونوميكا جانە قارجى سەكتورلارىنىڭ قۇلدىراۋىنا جول بەرمەۋ.
«ارينە قالىپتاسىپ وتىرعان جاعداي وڭاي ەمەس. بۇل – بۇكىل الەم مەملەكەتتەرىنە تۇسكەن زور اۋىرتپاشىلىق. ءبىز ونى وسىنداي سىن ساعاتتا سەپتىگىن تيگىزەتىن حالقىمىزدىڭ توزىمدىلىگى, ەرىك-جىگەرى جانە وزىنە دەگەن زور سەنىمى ارقاسىندا مىندەتتى تۇردە جەڭىپ شىعامىز. ول ءۇشىن بىزگە قاجەتتى نارسە – قارجى-قاراجات, ماتەريالدىق رەسۋرس, تەحنيكا, ازىق-ت ۇلىك – ءبارى بار. الاڭدايتىن, ابىرجيتىن ەش نەگىز جوق», دەدى ەلباسى. وسى ءسوز ءبىزدى سابىرعا, توزىمگە شاقىرادى.
ەلباسى ايتقانداي, وسىنداي قيىن-قىستاۋ شاقتا ەلدەگى قوعامدىق-ساياسي جاعدايدى شايقاۋعا قابىلەتتى كۇشتەردىڭ پايدا بولۋىنا جول بەرمەۋ قاجەت. تاياۋ جانە ورتا شىعىس, سولتۇستىك افريكا ەلدەرىنىڭ تاريحي تاجىريبەسى كورسەتكەندەي, مۇنداي جاعدايدى حالىقارالىق ەكسترەميستىك جانە لاڭكەستىك ۇيىمدار مىندەتتە تۇردە ەتنوسارالىق جانە كونفەسسياارالىق شيەلەنىستەر تۋدىرۋ ءۇشىن قولدانۋى مۇمكىن. سوندىقتان تۇڭعىش پرەزيدەنتىمىزدىڭ پايىمىمەن بۇل كەزەڭدى ءبىز ءبىلىم الۋعا, عىلىممەن اينالىسۋعا ءتيىمدى جۇمساي بىلگەنىمىز ءجون.
قازاقستان باسشىلىعى بۇگىنگى جاعدايدىڭ كۇردەلى دە تۇراقسىز ەكەندىگىن جاسىرمايدى. دەسە دە, نۇرسۇلتان ءابىش ۇلى ءوز ماقالاسىندا وسى داعدارىستى ەڭسەرەتىن كۇشىمىز دە, مۇمكىندىگىمىز دە بار ەكەنىن اتاپ ءوتتى. ەلباسىنىڭ كۇش-جىگەرىمەن تاۋەلسىزدىك جىلدارى ۇلتتىق قورىمىزدى جاساقتادىق. قازىر وندا 90 ميلليارد دوللار بار. ياعني, ءاربىر قازاقستاندىققا مەملەكەت تاراپىنان قاجەتتى قامقورلىق كورسەتىلەدى. ەڭ باستىسى, ءبىرتۇتاس جانە ۇيىمشىل بولۋىمىز قاجەت.
ءابساتتار دەربىسالى,
ر.ب.سۇلەيمەنوۆ اتىنداعى شىعىستانۋ ينستيتۋتىنىڭ ديرەكتورى, اكادەميك, پروفەسسور