سوڭعى تاۋلىكتىڭ وزىندە عانا قىزىلوردا وبلىسىندا جاڭادان ۆيرۋس جۇقتىرعان 23 تۇرعىن انىقتالىپ, جالپى ناۋقاستاردىڭ سانى 92 ادامعا جەتتى. كۇندەلىكتى باق وكىلدەرى ءۇشىن ونلاين بريفينگ وتكىزىپ تۇراتىن وبلىستىق دەنساۋلىق ساقتاۋ باسقارماسىنىڭ باسشىسى جاقسىلىق ابدىسامەتوۆ وسىنىڭ ءبارى كارانتين ءتارتىبىن ساقتاماۋدان بولىپ وتىرعانىن ايتادى.
- اۋرۋدى ەمدەۋ دارىگەردىڭ مىندەتى. ال ودان ساقتانىپ ءجۇرۋ, ورتاق تالاپقا باعىنۋ كەز كەلگەن ادامنىڭ وزىنە بايلانىستى. ۆيرۋستىڭ تارالۋىنا وراي تالاي مارتە تۇسىندىرمە جۇمىستارى جاسالدى, بىراق سوعان قۇلاق اسىپ جاتقاندار از. وزىنە قويىلعان دياگنوزبەن كەلىسپەي, اۋرۋحاناعا جاتۋدان باس تارتقاندار دا بولىپ جاتىر. ەڭ قيىنى, توي-تومالاق تيىلماي تۇر, – دەيدى باس دارىگەر.
وسىعان دەيىنگى شەكتەۋلەرگە قاراماستان 17 ءۇي يەسى ءوز اۋلاسىندا توي جاساپ, 48 ءدامحانا قىزمەتتەرىن جالعاستىرعان. موبيلدىك توپتار توتەنشە جاعداي ۋاقىتىندا بەلگىلەنگەن تالاپتاردى بۇزعان 90 فاكتى انىقتادى.
وسىنىڭ ءبارى اۋرۋدىڭ تارالۋ اياسىن شەكتەپ, ادامداردى قاتەرلى ىندەتتەن امان الىپ قالۋ ءۇشىن جاسالىپ جاتقان امالدار. بيلىك قولىنان كەلگەننىڭ ءبارىن جاسايدى, بىراق سونى تۇرعىندار ءتۇسىنۋى ءتيىس. جاسىرىپ جاساعان تويدىڭ اقىرى توپىرلاعان اۋرۋعا ۇلاسىپ جاتۋى كىمگە ابىروي اپەرەدى دەيسىز؟...