«قازاقفيلم» كينوستۋدياسى كارانتين كەزىندە قازاقستاندىقتار ءۇشىن قىزىقتى ءارى قاۋىپسىز دەمالىس ۇيىمداستىرۋ ماقساتىندا مادەنيەت جانە سپورت مينيسترلىگىنىڭ تاپسىرىسىمەن تۇسىرىلگەن فيلمدەردى #bizbirgemiz ناۋقانى اياسىندا وتاندىق تەلەارنالارعا ۇسىنىپ وتىر.
وسى ورايدا «قازاقفيلم» تۋىندىلارىن رەسپۋبليكالىق «كتك», «حابار» جانە «قازاقستان» تەلەارنالارى ارقىلى پرايم-تايم ۋاقىتىندا كورۋگە بولادى. كينوستۋديانىڭ ءباسپاسوز دەرەكتەرىندە فيلمدەردى كورۋ ۋاقىتى دا كورسەتىلگەن. مىسالى, «كتك» ارناسى دەمالىس كۇندەرى ساعات 16:30 كورەرمەندەرگە وتاندىق فيلمدەردى كورۋگە مۇمكىندىك جاساپ, ء«ۇي كينوسەانسى» جوباسىن باستادى. جوبا 28 ناۋرىز كۇنى ايگىلى «ايكا» ءفيلمىنىڭ كورسەتىلىمىنەن باستالىپ, دەمالىس كۇندەرى «قازاقفيلمنىڭ» «16 قىز», «جاڭعاق تال», «ۇستاز» جانە «ليكۆيداتور» سىندى فيلمدەرىن كورسەتۋدى جوسپارلاپ وتىر.
جوبا اياسىندا كورەرمەندەرگە بەدەلدى فەستيۆالدەردە جۇلدەلى بولعان فيلمدەر: ەمير بايعازيننىڭ العاشقى جۇمىسى, قازاقستاندىقتار اراسىندا تۇڭعىش «كۇمىس ايۋ» جۇلدەسىن جانە 63-ءى بەرلين كينوفەستيۆالىندە Morgenpost گازەتىنىڭ سىيلىعىن العان «اسلاننىڭ ساباقتارى»; 75-ءى ۆەنەتسيا كينوفەستيۆالىندە «ۇزدىك رەجيسسەر» نوميناتسياسىن جەڭىپ العان «وزەن»; 41-ءشى ماسكەۋ حالىقارالىق كينوفەستيۆالىندە گران-پري («التىن گەورگي» سىيلىعى) جانە XV حالىقارالىق «ەۋرازيا» كينوفەستيۆالىندە گران-پري العان فارحات شاريپوۆتىڭ «تۇلعالىق ءوسۋ ترەنينگى» فيلمدەرى كورەرمەنگە جول تارتادى.
«قازاقستان» ۇلتتىق ارناسى كورەرمەندەرگە «جەرۇيىق», توميريس», «جاۋجۇرەك مىڭ بالا», «اناعا اپارار جول», «شىراقشى/حرانيتەل», «تالان», «16 قىز» (2 ءبولىم), «ايكا», «كومپوزيتور», «قازاق حاندىعى. التىن تاق» كوركەم فيلمدەرىن, «مۇزبالاق», «كۇلتەگىن», «ەر توستىك جانە ايداھار» انيماتسيالىق فيلمدەرىن كورسەتەدى.
«حابار» جانە «ەل ارنا» تەلەارنالارى بيىل «قازاقفيلمنىڭ» جۇزدەگەن كوركەم, دەرەكتى جانە انيماتسيالىق فيلمدەرىن كورسەتۋدى جوسپارلاپ وتىر. 5 ساۋىردە باستالعان «وتاندىق فيلمدەر ونكۇندىگى» جوباسىنىڭ اياسىندا «حابار» تەلەارناسىنىڭ كورەرمەندەرى «16 قىز», «قىزعىلت قويان تۋرالى ەرتەگى», «اناعا اپارار جول», «شال», «كەنجە», «توميريس» جانە «شىراقشى» فيلمدەرىن كورە الادى.
سونىمەن قاتار «قازاقفيلمنىڭ» اكىمشىلىگى كينوستۋديانىڭ رەسمي Youtube-ارناسىنىڭ (https://www.youtube.com/user/kazakhfilmstudios) فيلموتەكاسىن بەلسەندى تولىقتىرىپ جاتقاندارىن ايتا كەتكەن ءجون.
ءدال كازىر, كەز-كەلگەن ىڭعايلى ۋاقىتتا ينتەرنەت قولدانۋشىلارى قازاق كينوسىنىڭ التىن قورىنا ەنگەن جانە شاكەن ايمانوۆتىڭ تۋىندىلارىن, سونداي-اق «قازاقفيلمنىڭ» انيماتسيالىق فيلمدەرىن كورە الادى.
الماتى