ەلدەگى احۋالعا بايلانىستى رەسپۋبليكاداعى 20 مىڭنان استام وقۋشى تاپسىرمالارىن «قازپوشتا» ارقىلى الادى. سونىمەن قاتار راديو جانە تەلەارنالار ارقىلى وتكىزىلەتىن ساباقتار مەن ءبىلىم بەرۋ ينتەرنەت-رەسۋرستارىن پايدالانۋعا بولادى.
ءبىلىم جانە عىلىم ۆيتسە-ءمينيسترى رۇستەم بيعاري مەن «قازپوشتا» اق باسقارما توراعاسى ساكەن سارسەنوۆ وسى باعىتتاعى ىنتىماقتاستىق تەتىكتەرىن تالقىلاپ, پاندەميا كەزەڭىندە وقۋ ماتەريالدارىن مۇعالىمدەردەن وقۋشىلارعا, وقۋشىلاردان مۇعالىمدەرگە كەرى جىبەرۋ جۇمىستارىن ۇيىمداستىرۋ قاجەتتىگى ايتىلدى. ءبىلىم جانە عىلىم مينيسترلىگىنىڭ مالىمەتى بويىنشا, ەلىمىزدەگى كەيبىر ەلدى مەكەندەردە مەكتەپ تە, ينتەرنەت تە جوق. ال وندا تۇراتىن مەكتەپ جاسىنداعى بالالار كورشى اۋىلدارعا كولىكپەن ارنايى جەتكىزىلىپ وتىرعان.
بالالاردىڭ دەر كەزىندە ءبىلىم الىپ, قاشىقتان وقۋىن ۇيىمداستىرۋ ماقساتىندا ءتيىستى سالا ماماندارى ىنتىماقتاستىق تۋرالى مەموراندۋمعا قول قويدى. وسىعان سايكەس وقۋشىلارعا ارنالعان وقۋ ماتەريالدارى «قازپوشتا» اق پوشتا بولىمشەلەرى ارقىلى جەتكىزىلەتىن بولادى. اتا-انالارعا پوشتا بايلانىسى قىزمەتى ءۇشىن تولەم جاساۋدىڭ قاجەتى جوق. قاشىقتان ءبىلىم بەرۋ تەحنولوگيالارىن قولدانۋ ارقىلى وقۋعا مۇمكىندىگى جوق وقۋشىلار تۋرالى دەرەكتەردى وبلىستىق جانە رەسپۋبليكالىق ماڭىزى بار قالالاردىڭ ءبىلىم باسقارمالارى وكىلدەرى ۇسىنادى. ايتا كەتكەن ءجون, شالعاي ەلدى مەكەندەردە ءومىر سۇرەتىن وقۋشىلارعا ارنالعان وقۋ ماتەريالدارى سانيتارلىق قاۋىپسىزدىكتىڭ بارلىق نورمالارىن ساقتاي وتىرىپ جەتكىزىلەتىن بولادى.