مادەنيەت جانە سپورت ءمينيسترى اقتوتى رايىمقۇلوۆا ەلىمىزدىڭ تۋريستىك سالاعا جاساپ جاتقان جانە جاسايتىن قولداۋى جايىندا ايتىپ بەردى.
مەملەكەت باسشىسى ەلىمىزدەگى توتەنشە جاعدايعا جانە مەملەكەتتىڭ داعدارىسقا قارسى ءىس-شارالارىنا بايلانىستى جاساعان ارنايى مالىمدەمەسىندە بيزنەس قاۋىمداستىققا ەكونوميكالىق سوققى بولاتىنىن اتاپ ءوتتى. بۇل رەتتە تۋريستىك سالانىڭ دا اجەپتاۋىر شىعىن كورەتىنى بەلگىلى.
«ساراپشىلاردىڭ ەسەبىنشە, تۋريزم يندۋسترياسىنا كوروناۆيرۋس ىندەتىنەن كەلەتىن شىعىن 11-ءشى قىركۇيەكتەگى تەراكتتەن دە بىرنەشە ەسە اۋىر بولاتىنعا ۇقسايدى. دەسە دە, ءبىزدىڭ ەلىمىز وسى ءبىر قىسىلتاياڭ شاقتان كەيىن تۋريستىك سالانىڭ ەڭسە تىكتەپ كەتۋىنە ىقپال ەتۋ ءۇشىن شاعىن جانە ورتا بيزنەسكە قولداۋ كورسەتۋدىڭ بۇرىن-سوڭدى بولماعان شارالارىن قولعا الىپ وتىر. ناقتىراق ايتسام, شاعىن جانە ورتا بيزنەس وكىلدەرى بيىلعى ءبىرىنشى قازانعا دەيىن ەڭبەكاقى تولەۋ قورىنان ۇستالاتىن سالىقتان بوساتىلماق. «بيزنەستىڭ جول كارتاسى – 2025» جانە «قاراپايىم زاتتار ەكونوميكاسى» باعدارلامالارى اياسىندا ەكونوميكانىڭ بارلىق سالاسى ءۇشىن (6 % وسىممەن كومەك-قارجى) بەرىلمەك», دەدى ا. رايىمقۇلوۆا.
ونىڭ ايتۋىنشا, مەملەكەت باسشىسى مەن ۇكىمەتتىڭ ءدال وسى بيزنەس وكىلدەرىنە جاساپ جاتقان قامقورلىعىن, ياعني سالىقتان بوساتۋ شاراسىن قوناق ءۇي بيزنەسى مەن تۋريزم سالاسىنداعى كاسىپكەرلەرگە داعدارىستان كەيىنگى كەزەڭگە دايىندالۋ ءۇشىن بەرىلگەن مۇمكىندىك دەپ قاراستىرعان ءجون.
«ماسەلەگە تەرەڭىرەك ۇڭىلسەك, ەلدەگى تۋريستىك سالانىڭ دامۋىنا ءدال وسى تۋريستىك وپەراتورلاردىڭ قوسار ۇلەسى قوماقتى. ءوز اقشاسىمەن قوسا ءار تۋريستەن العان قاراجاتتىڭ قوماقتى سوماسىن قوناق ۇيلەر مەن اۋە تاسىمالداۋشىلارىنا اۋدارىپ قويادى. ال الەمدە مىنانداي احۋال ورناپ, تۇتاستاي سالا توقىراپ قالعاندا, سول سالعان اقشانى كەرى قايتارۋ مەحانيزمى وزگە سالالارعا قاراعاندا ەرەكشە», دەدى مينيستر.
قازىرگى تاڭدا 26 تۋراگەنتتىك ءوز كليەنتتەرىنە 3,8 ملرد تەڭگەنى قايتارۋى كەرەك ەكەن.
«ولار بۇگىندە وسى قاراجاتتى قايتارۋ ءۇشىن ءوز سەرىكتەستەرىمەن كەلىسسوزدەر جۇرگىزۋگە. ال زاڭ تۇرعىسىنان راسىمدەردى شەشۋگە ءتيىستى ۋاقىت قاجەت. وسىعان بايلانىستى, ازاماتتاردان جاعدايعا تۇسىنۋشىلىكپەن قاراۋدى جانە كۇتە تۇرۋدى سۇرايمىز.«تۋريستىك قىزمەت تۋرالى» زاڭنىڭ 17-بابىنا سايكەس تۋريستەردىڭ قاراجاتىن تۋروپەراتورلار iس جۇزiندە شىعارعان شىعىندارىن شەگەرە وتىرىپ قايتارادى جانە تۋروپەراتورلار دا ءوز تاراپىنان تۋىنداعان جاعدايدان شىعۋدىڭ ءتۇرلى جولدارىن ۇسىنادى. ولاردىڭ اراسىندا دەمالىس كۇندەرىن اۋىستىرۋ مۇمكىندىگى بار. ياعني, ساپاردى باسقا مەرزىمگە كەيىنگە قالدىرۋعا بولادى. وسىعان ۇقساس مىسالدار كوپ», - دەدى مينيستر.
ونىڭ ايتۋىنشا, مينيسترلىك تاراپىنان ماسەلەنى وڭتايلى شەشۋ ماقساتىندا يندۋستريا جانە ينفراقۇرىلىمدىق دامۋ مينيسترلىگىمەن بىرلەسىپ, وتاندىق جانە شەتەلدىك اۋە-تاسىمالداۋشىلاردىڭ قاتىسۋىمەن كەڭەس ءوتتى. وندا بيلەتتەردى ايىپپۇلسىز قايتارۋ جونىندە شەشىم قابىلداندى.مينيسترلىك بۇگىندە تۋراگەنتتىكتەرمەن توتەنشە جاعدايدان كەيىنگى كەزەڭدى, ىشكى ءتۋريزمدى دامىتۋعا ەكپىن سالۋ ماسەلەلەرىن پىسىقتاۋدا.