بيىلعى 2020 جىلدىڭ قاڭتار ايىندا سىبايلاس جەمقورلىققا قارسى ءىس-قيمىل اگەنتتىگى مەن «اتامەكەن» ۇكپ «مەملەكەتتىك ساتىپ الۋدىڭ بىرىڭعاي تەرەزەسى» اقپاراتتىق تالداۋ جۇيەسىن قۇرعانى ءمالىم. ءسويتىپ, بۇدان ءۇش اي بۇرىن اتالعان جۇيە ءوز قىزمەتىن باستاپ كەتكەن-ءدى. وسى ۋاقىت ارالىعىندا جۇيەدە جۇرگىزىلگەن مونيتورينگتەر جوعارى ساپالىق دەڭگەيگە يە بولا باستاعانى بەلگىلى بولىپ وتىر.
ونىڭ باستى ءبىر ايعاعى بيىلعى 2020 جىلدىڭ العاشقى توقسانىندا اقتوبە وبلىسىندا مەملەكەتتىك ساتىپ الۋردان 62 ميلليون تەڭگەدەن اسا قاراجات ۇنەمدەلگەنى. بۇل جاعىمدى جايت اقپاراتتىق تالداۋ جۇيەسى ارقىلى جۇرگىزىلگەن مونيتورينگ نەگىزىندە ايقىندالعان. اتالعان جۇيە قۇرىلعان كۇننەن بەرى تاۋارلار مەن قىزمەت تۇرلەرىنە ساتىپ الۋ لوتى جاريالانىپ كەلەدى.
مامانداردىڭ مالىمدەۋىنشە, باعانى نەگىزسىز كوتەرەتىن مەملەكەتتىك ساتىپ الۋ ۇدەرىسىنە قاتىسۋشىلار اۆتوماتتاندىرىلعان تالداۋ ارقىلى انىقتالىپ وتىرادى. ياعني لوتتاعى تاۋارلار مەن قىزمەتتەردىڭ ورتاشا باعاسى ءدال وسىنداي تاۋار نە قىزمەت ءتۇرىن جاريالاعان وزگە لوتتارداعى باعامەن اۆتوماتتى تۇردە سالىستىرىلادى. ءدال وسى تۇستا الشاقتىققا جول بەرگەن مەملەكەتتىك ورگاندار مەن كۆازيمەملەكەتتىك سەكتور نىساندارى بىردەن انىقتالادى دەدى Egemen.kz تىلشىسىنە سىبايلاس جەمقورلىققا قارسى ءىس-قيمىل اگەنتتىگى اقتوبە وبلىسى بويىنشا دەپارتامەنتىنىڭ باسشىسى مەرلان مۇحامبەتوۆ.
سونداي-اق, ونىڭ ايتۋىنشا, مۇنداي باعا بۇرمالاۋشىلارعا جول بەرگەندەرگە ورتاشا نارىقتىق باعالاردى قولدانۋ ەسكەرتىلەدى. سوعان قاراماستان مەملەكەتتىك ساتىپ الۋ باعاسى قۇقىقبۇزۋشىلىققا بەيىم تۇرادى ەكەن. قازىرگى دەرەكتەر سالاداعى زاڭبۇزۋشىلىقتار جىل سايىن ءوسىپ كەلە جاتقانىن كورسەتۋى دە سوندىقتان بولسا كەرەك.
ايتالىق وتكەن 2019 جىلى مەملەكەتتىك ساتىپ الۋلار كەزىندە اقتوبە وبلىسى بويىنشا 14 قۇقىقبۇزۋشىلىق انىقتالسا, ونىڭ الدىنداعى 2018 جىلى تەك توعىز دەرەك تىركەلگەن.
اقتوبە وبلىسى