اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە ونەر مادەنيەت جانە سپورت ينcتيتۋتىنىڭ باستاپقى اسكەري دايىندىق كافەدراسىنىڭ پروفەسسور-وقىتۋشىلار قۇرامى قاشىقتان ءبىلىم بەرۋ جۇيەسىنە كوشتى.
ۋنيۆەرسيتەتتىڭ ءباسپاسوز قىزمەتىنىڭ مالىمەتىنە سۇيەنسەك, ونەر مادەنيەت جانە سپورت ينcتيتۋتىنىڭ باستاپقى اسكەري دايىندىق كافەدراسىنىڭ اعا وقىتۋشىسى ماگيستر ن.تولەگەن ۇلى مەن گ. احمەتوۆا ءبىلىم جانە عىلىم مينيسترلىگى ۇيىمداستىرعان ۆەبينارعا قاتىسىپ, (https://youtu.be/RkjSF9y4l4c) قاشىقتان ءبىلىم بەرۋدىڭ زاماناۋي تەتىكتەرىنىڭ ءبىرى ZOOM جۇيەسىن مەڭگەردى. اتالعان وقىتۋشىلار كافەدرانىڭ باسقا پروفەسسور-وقىتۋشىلارىنا قىسقا مەرزىمدە تاجىريبەلەرىمەن ءبولىستى. وسى باعىتتا كافەدرا ينستيتۋت كولەمىندە الدىڭعى ساپتان كورىنە ءبىلىپ, ستۋدەنتتەردىڭ ۋاقىتىندا جانە ساپالى ءبىلىم الۋ ءۇردىسىن جالعاستىرۋدا. ستۋدەنتتەر پەن ماگيسترانتتار اعىمداعى ارالىق باقىلاۋ مەن ەمتيحان كەزەڭىنە باعىتتالعان وقۋ باعدارلاماسىن قاشىقتان ۇيرەنىپ, ءبىلىم الۋدىڭ زامانۋي تەتىكتەرىن مەڭگەرۋدە.