اتىراۋ قالالىق كاسىپكەرلىك جانە تۋريزم ءبولىمىنىڭ مالىمەتىنە قاراعاندا, قازىر 8 ناۋبايحانا ءۇزىلىسسىز جۇمىس ىستەپ تۇر. بۇلاردا تاۋلىگىنە 40 مىڭ بولكە نان پىسىرىلەدى. ال, «داۋلەت نان» جشس-ءنىڭ نان ءپىسىرۋ تسەحى ءوندىرىس قۋاتىن ۇلعايتۋدى كوزدەپ وتىر. مۇندا وسى كەزگە دەيىن تاۋلىگىنە 7 مىڭ بولكە نان پىسىرىلگەن. ەندى بۇل كورسەتكىشتى تاۋلىگىنە 15 مىڭعا دەيىن كوبەيتپەك.
- قازىرگى ۋاقىتتا نان تسەحىندا 90 ادام جۇمىس ىستەيدى. جۇمىسشىلار سانىن قىسقارتپايمىز. كەرىسىنشە, ءبىز قوسىمشا ادامداردى جۇمىسقا تارتىپ, جۇمىسشىلار قاتارىن كوبەيتەمىز, -دەيدى «داۋلەت نان» جشس-ءنىڭ وكىلى فارۋح ابدۋللاەۆ.
وڭىرلىك كوممۋنيكاتسيالار قىزمەتىنىڭ مالىمەتىنشە, اتىراۋ وبلىسىندا 824 توننا ۇن قورى بار. ونىڭ 520 تونناسى تۇراقتاندىرۋ قورىندا ساقتاۋلى تۇر. جەرگىلىكتى اكىمدىك توتەنشە جاعداي كەزىندەگى تۇراقتىلىقتى ساقتاۋ ءۇشىن قوسىمشا 17 مىڭ 115 توننا ۇن ساتىپ الۋدى جوسپارلاپ وتىر.
جولداسبەك كوشەرباي ۇلى