نۇر - سۇلتان قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ «قورقىت» ەتنو-ءانسامبلىنىڭ ونەرپازى, دومبىراشى ءارى توپتىڭ كونتسەرتمەيسترى ايبەك ارىمبەك التىن وردانىڭ 750 جىلدىعىنا ارناپ كۇي شىعاردى. كۇيشىنىڭ ايتۋىنشا بۇل تۋىندى ءبىر جەتىنىڭ ىشىندە تۋعان.
– كۇي وتە جىلدام تەمپپەن ورىندالادى. بۇدان قازاق باتىرلارىنىڭ بەينەسىن كورۋگە بولادى. جالپى, جاستارىمىزعا پاتريوتتىق رۋح بەرۋ ءۇشىن شىعارىلعان دۇنيە. ءۇش بولىممەن تۇراتىن كۇي شامامەن ەكى مينۋتقا سوزىلادى, – دەيدى ايبەك كەنجەباي ۇلى.
الماتى وبلىسى كەربۇلاق اۋدانى, قاراشوقى اۋىلىنىڭ تۋماسى, 24 جاستاعى ونەرپاز شىعارماشىلىققا 14-15 جاسىنان باستاپ بەت بۇرا باستاپتى.
– اكەم ۇيىرمەگە قاتىسىپ, دومبىراشى بولعانىمدى قالايتىن. باستاپقى كەزدە دومبىراعا دەگەن مۇلدەم قىزىعۋشىلىعىم بولعان جوق. ءبىر كۇنى تەلەديداردان دومبىراشى, «دارىن» مەملەكەتتىك جاستار سىيلىعىنىڭ لاۋرەاتى مۇراگەر ساۋرانباەۆ اعامىزدىڭ جەكە كونتسەرتىن كورىپ قالدىم. كونتسەرت اياقتالعان سوڭ بارشا كورەرمەن قول سوعىپ, جىلى لەبىزىن ءبىلدىرىپ جاتتى. دومبىراشىنىڭ تالانتى, شەرتكەن كۇيىنىڭ كۇمبىرى جۇرەگىمە وتە قاتتى اسەر ەتتى. 2011 جىلى الماتى قالاسىنداعى پ.چايكوۆسكي اتىنداعى الماتى مۋزىكالىق كوللەدجىنە كۇيشى,پرەزيدەنت ستيپەندياسىنىڭ يەگەرى اقباسوۆ سايات قىرعىزباي ۇلىنىڭ سىنىبىنا ءتۇسىپ, ونى تامامداعان سوڭ نۇر-سۇلتان قالاسىنداعى قازاق ۇلتتىق ونەر ۋنيۆەرسيتەتىندەگى ءداستۇرلى ونەر فاكۋلتەتىنىڭ «دومبىراشى» ماماندىعىن پروفەسسور, قر ەڭبەك سىڭىرگەن قايراتكەرى, كومپوزيتور ورىنباي دۇيسەن كارىعۇل ۇلىنىڭ سىنىبىندا وقىپ شىقتىم, – دەيدى كۇيشى.