جامبىل وبلىسىندا كوروناۆيرۋستى ينفەكتسيامەن اۋىرعان ناۋقاس تىركەلدى. كوروناۆيرۋس ينفەكتسياسىن جۇقتىرعان شۋ اۋدانىنىڭ 29 جاستاعى تۇرعىنى بولىپ شىقتى. وسى ماسەلەگە بايلانىستى وڭىرلىك كوممۋنيكاتسيالار قىزمەتىنىڭ الاڭىندا شۇعىل بريفينگ ۇيىمداستىرىلدى. جامبىل وبلىستىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆتىڭ ايتۋىنشا, ناۋقاس 23 ناۋرىز كۇنى قىرعىز رەسپۋبليكاسىنان كەلگەن.
باسقارما باسشىسى ناۋقاستىڭ 24 ناۋرىز كۇنى كارانتيندىك ستاتسيونارعا جاتقىزىلعانىن حابارلادى. ناۋقاستىڭ دەنە قىزۋى جوق, جاعدايى بىرقالىپتى. سونداي-اق, مارات جۇمانقۇلوۆ بۇگىندە ناۋقاستىڭ مامانداردىڭ باقىلاۋىندا ەكەنىن جەتكىزدى. بۇگىنگى تاڭدا ناۋقاسپەن 13 ادامنىڭ بايلانىستا بولعانى انىقتالىپ, ولار كارانيتنگە وقشاۋلانعان. ولاردىڭ مەكەنجايى جانە ورنالاسقان جەرى بويىنشا دەزينفەكتسيالىق وڭدەۋ شارالارى جۇرگىزىلگەن.
سونىمەن قاتار, جامبىل وبلىسىنىڭ اكىمدىگى ەلگە كەلگەن سوڭ اتالعان تۇرعىنعا زەرتحانالىق تەكسەرۋدىڭ جۇرگىزىلگەنىن, الدىن الا جۇرگىزىلگەن تالداۋلار قورىتىندىسى كوروناۆيرۋستىق ينفەكتسياعا وڭ ناتيجە كورسەتكەنىن مالىمدەدى. الىنعان بيوماتەريالدار قوسىمشا زەرتتەۋ ءۇشىن الماتى قالاسىنا جىبەرىلگەن. سوڭعى ناتيجەلەر زەرتحانالىق زەرتتەۋ قورىتىندىسى الىنعاننان كەيىن جاريالانادى.
ايتا كەتەيىك, وسى ورايدا الەۋمەتتىك جەلىلەر مەن مەسسەندجەرلەردە ت.رىسقۇلوۆ اۋدانى تۇرعىنىنىڭ كوروناۆيرۋسپەن اۋىرعانى جايلى اقپارات تاراتىلۋدا. الايدا, مۇنداي حابارلامالاردىڭ شىندىققا ساي كەلمەيتىنىن اتاپ وتكەن ءجون.
جامبىل وبلىسى