توتەنشە جاعداي كەزىندە تابىسىنان ايىرىلعاندارعا اي سايىن ەڭ تومەنگى جالاقى مولشەرىندە جاردەماقى بەرىلەدى. بۇل تۋرالى مەملەكەت باسشىسى قاسىم-جومارت توقاەۆ توتەنشە جاعداي جونىندەگى مەملەكەتتىك كوميسسيانىڭ وتىرىسىندا ايتتى.
«توتەنشە جاعداي رەجيمى ەنگىزىلۋىنە بايلانىستى تابىسىنان ايىرىلعان ادامدارعا اي سايىن ەڭ تومەنگى جالاقى مولشەرىندە (42 500 تەڭگە) تولەم جاساي باستاۋدى تاپسىرامىن. جالپى مۇنداي كومەكتى كەمىندە 1,5 ميلليوننان استام ادام الادى. قاجەت بولعان جاعدايدا سومانى ارتتىرۋعا جانە قولداۋ تۇرلەرىن كەڭەيتۋگە بارلىق رەزەرۆىمىز بار. مەملەكەتتىك كوميسسياعا تولەمدەردىڭ ءتيىمدى جانە اشىق تەتىگىن ازىرلەۋدى تاپسىرامىن», دەدى قازاقستان پرەزيدەنتى.