ەلىمىزدە توتەنشە جاعداي ەنگىزىلگەنىنە بايلانىستى مەملەكەتتىك كىرىستەر كوميتەتى كاسىپكەرلەرگە بىرقاتار مەملەكەتتىك قولداۋ كورسەتپەك. قولداۋ شارالارى ينۆەستيتسيالىق سالىقتىق ارتىقشىلىقتار, ارنايى ەكونوميكالىق ايماقتار, ارنايى سالىقتىق رەجىمدەر ارقىلى جاسالادى.
كوميتەتتىڭ ءباسپاسوز قىزمەتى حابارلاعانداي, جەڭىلدىكتەر كاسىپكەرلىك سۋبەكتىلەرى مەن اگروونەركاسىپ كەشەنىن قولداۋعا ارنالعان.
– 2018 جىلدىڭ قورىتىندىسى بويىنشا سالىق تولەۋشىلەر 4,5 ترلن تەڭگەگە سالىقتان بوساتىلدى. 2019 جىلى دا وسىنداي مولشەردە سالىقتىق جەڭىلدىكتەر جاسالدى. بيىلدان باستاپ ارنايى سالىق رەجىمى بويىنشا ەسەپ ايىرىساتىن ميكرو جانە شاعىن كاسىپكەرلىك سۋبەكتىلەرى 3 جىلعا سالىق تولەۋدەن بوساتىلدى. بۇل سۋبەكتىلەردى تەكسەرۋگە موراتوري جاريالاندى. بۇعان قوسا ەلىمىزدە توتەنشە جاعدايدىڭ ەنگىزىلۋىنە بايلانىستى, قارىم-قاتىناستى ازايتۋ ءۇشىن زاڭدى جانە جەكە تۇلعالارعا دەكلاراتسيا تاپسىرۋ مەرزىمى توتەنشە جاعدايدىڭ ۋاقىتىنا سايكەس كەلگەندىكتەن, ونى 30 كۇنتىزبەلىك كۇنگە كەيىنگە شەگەرۋ تۋرالى شەشىم قابىلداندى, – دەپ حابارلادى ءتيىستى كوميتەت.
سونداي-اق سالىق كودەكسىندە توتەنشە جاعداي كەزىندە قارىز كەيىنگە شەگەرىلسە, وعان ءوسىمپۇل ەسەپتەلمەيدى. الايدا ونداي جەڭىلدىكتى الۋ ءۇشىن كەپىلزات نەمەسە بانكتىك كەپىلدىك قاجەت. وسىعان وراي توتەنشە جاعداي كەزىندە سالىقتىق مىندەتتەمەلەر بويىنشا قارىز بەن ءوسىمپۇلدى كەيىنگە شەگەرۋدى وڭتايلاندىراتىن تەتىكتەر قاراستىرىلۋدا.
توتەنشە جاعداي كەزىندە كامەرالدى باقىلاۋ قورىتىندىسى بويىنشا حابارلامالار جىبەرۋ توقتاتىلادى. نىساندارعا بارىپ, كەدەندىك جانە سالىقتىق تەكسەرىستەر جۇرگىزۋ ازايتىلادى. اكىمشىلىك جاۋاپكەرشىلىككە تارتۋ ماسەلەسى توتەنشە جاعداي مەرزىمى اياقتالعاننان كەيىن قاراستىرىلادى. بۇدان وزگە قولداۋ كورسەتۋ شارالارى قاراستىرىلماعان.
ءباسپاسوز قىزمەتى حابارلاعانداي, جۇمىس بەرۋشىلەر ناۋرىز ايىندا تولەگەن جالاقىنىڭ سالىعىن 25 ساۋىرگە دەيىن تولەۋى كەرەك. ەڭبەكاقى ەسەپتەلمەگەن نەمەسە تولەنبەگەن بولسا, سالىقتىق مىندەتتەمەلەر قاراستىرىلمايدى.