قازاق حالقى تاۋەلسىزدىكتى عاسىرلار بويى اڭسادى. سول ءۇشىن كۇرەستى. وسى ءبىر يگى ارمان, ۇلى ماقساتىنا باعىتتالار ءۇمىتى مەن سەنىمىنەن اينىعان جوق. اللاعا شۇكىر, ۇزدىگە كۇتكەن ءۇمىتىمىز اقتالدى. اڭساعان اسىل ارمانىمىز ورىندالدى. قايعىسىز, قاسىرەتسىز تاۋەلسىزدىگىمىز ءوز قولىمىزعا ءتيدى.
تاۋەلسىزدىككە قول جەتكىزۋ قانداي قيىن بولسا, ونىڭ ءارى قارايعى بولاشاعىن باياندى ەتۋ ۇلتىمىزدان ودان دا ەرەن قاجىردى تالاپ ەتتى. وسى جولدا ەلىمىزگە نۇرسۇلتان نازارباەۆتاي كورەگەن كوشباسشىنى بۇيىرتتى. ادىمىن اپىل-تاپىل باسقان ءسابي مەملەكەتىمىزدى تۇڭعىش پرەزيدەنت ۇلكەن بەلەسكە شىعارىپ, الەم الدىنداعى ابىرويىن اسقاقتاتتى. ءىرى ماقساتتى ىستەردىڭ بارلىعىن تولىقتاي جۇزەگە اسىردى دەپ سەنىممەن ايتا الامىز. تاۋەلسىزدىك قولعا تيگەن كۇندەردەن باستاپ الەم الدىنداعى بەدەلىمىز ارتىپ, اتا-بابالارىمىز ارمان ەتكەن دامۋدىڭ داڭعىل جولىنا تۇستىك. مۇنىڭ بارلىعى ۋاقىت-اعزام الاقانىندا التىن ارىپپەن جازىلىپ قالدى. ءالى دە جازىلا بەرمەك.
مىنە, اتا زاڭىمىز – كونستيتۋتسيا بويىنشا ەلباسى ءوزىنىڭ وكىلەتتىگىن توقتاتىپ, سوڭعى ءبىر جىلدا بيلىك تىزگىنىن ءىزىن باسقان رۋحاني, مۇددەلەس ءىنىسى قاسىم-جومارت كەمەل ۇلى توقاەۆقا تاپسىردى. جاڭا پرەزيدەنتىمىز دە وزىنە جۇكتەلگەن جاۋاپكەرشىلىكتى جۇرەگىمەن سەزىنىپ, حالىق الدىنداعى مىندەتىن ابىرويمەن اتقارىپ كەلەدى.
جالپى, جەكە ءوز باسىم تۇڭعىش پرەزيدەنت – ەلباسى نۇرسۇلتان نازارباەۆپەن ونەر ادامى رەتىندە وتە تىعىز بايلانىستا بولدىق. ءبىر-ءبىرىمىزدى سىيلادىق. ول كىسى مەنىڭ اندەرىمدى وتە جاقسى كوردى. ويتكەنى ول اندەردى حالىق ءسۇيىپ شىرقادى.
بىردە ەلباسىنىڭ ءومىر جولىنا ارنالعان كوپ سەريالى دەرەكتى ءفيلمدى تاماشالاپ وتىرىپ, ءبىر بولىمىندە نۇرەكەڭنىڭ وتباسىنىڭ ورتاسىندا دومبىرامەن شەرتىپ مەنىڭ «تولاعاي» دەگەن ءانىمدى ايتىپ وتىرعانىن كورگەندە, جۇرەگىم ەرەكشە تولقىدى. ول كىسى ءوزىنىڭ وسىنداي قاراپايىم بولسا دا بىلىكتى, ءبىلىمدى تىرلىگىمەن حالىقتىڭ ۇلكەن العىسىنا بولەنگەن ادام.
بۇگىندە قازاقستان دامۋدىڭ بارلىق سالاسىندا ىلگەرىلەپ, نۇرلى كۇندەرگە قاراي باعىت بۇرىپ بارا جاتىرمىز. وسى بەيبىت, بەرەكەلى كۇنىمىزگە تاۋبە ەتە بىلەيىك. اللا تاعالا جاڭا پرەزيدەنتىمىز قاسىم-جومارت توقاەۆقا دا وسى ءبىر ابىرويلى, جەمىستى جولدى بۇيىرتىپ, ەلدىڭ العىس-ماحابباتىنا بولەنۋىن تىلەيمىز. ءاماندا تاۋەلسىزدىگىمىز, ەلدىگىمىز ماڭگىلىك بولعاي!
ءىليا جاقانوۆ,
قازاقستان مەن قىرعىزستاننىڭ ەڭبەك سىڭىرگەن قايراتكەرى, كومپوزيتور, ونەر زەرتتەۋشىسى