اقتاۋداعى ىرگەلى مەملەكەتتىك وقۋ ورنى - كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتى كورونوۆيرۋسقا بايلانىستى قاشىقتان وقىتۋعا كوشتى. ۋنيۆەرسيتەتتە جوعارى وقۋ ورنى ءۇشىن بۇل ءتاسىل جاڭالىق ەمەس, سوندىقتان قانداي دا ءبىر قيىندىق تۋعىزباعان. ويتكەنى, ستۋدەنتتەردىڭ قاشىقتان ءبىلىم الۋىنا جول اشقان «ۋنيۆەر» ىشكى LMS جۇيەسى بىرنەشە جىلدان بەرى قولدانىستا بار.
قازىرگى ۋاقىتتا وقۋ ورنىندا 8 مىڭعا جۋىق ستۋدەنت وقيتىن بولسا, ونىڭ ءبىر مىڭنان استامى قاشىقتان وقىتۋ تەحنولوگياسى بويىنشا ءبىلىم الادى. بۇگىننەن باستاپ مينيسترلىكتىڭ بۇيرىعىنا سايكەس, جوعارى وقۋ ورنىندا ءبىلىم الۋشىلاردىڭ بارلىعى بىردەي ونلاين رەجيمگە كوشىرىلدى. ايتا كەتەيىك, بۇعان دەيىن 1-كۋرس ستۋدەنتتەرى ءۇشىن تاجىريبە تۇرىندە وتكەن ونلاين لەكتسيالار ءوزىنىڭ تيىمدىلىگىن بايقاتقان.
ستۋدەنت پەن وقىتۋشىنىڭ اراسىنداعى قارىم-قاتىناسى ىشكى كامپۋستاعى سياقتى بولۋى ءۇشىن Google Hangouts Meet دەگەن پلاتفورماسىنا كوشتىك. ءبىزدىڭ ۋنيۆەرسيتەت Google پلاتفورماسىنا 2017 جىلدان باستاپ وتكەن سوڭ وسى پلاتفورما ءبىز ءۇشىن ىڭعايلى بولدى. قازىرگى جاعدايدا 350-گە جۋىق وقىتۋشى-پروفەسسورلاردىڭ بارلىعى تىكەلەي ونلاين رەجيمدە قاشىقتان وقىتۋدى جۇرگىزىپ جاتىر. ونىڭ ءجۇزى الدىن-الا وسى قاشىقتان وقىتۋ تەحنولوگياسىمەن ساباق بەرگەن ادامدار, دەيدى ءبىلىم ورداسىنىڭ باسشىسى بەرىك احمەتوۆ.