بۇگىن الماتى قالالىق اكىمدىگىندە ءبىلىم بەرۋ مەكەمەلەرىنىڭ جۇمىس ىستەۋ فورماتى ءتۇسىندىرىلدى. دۇنيەجۇزىلىك دەنساۋلىق ساقتاۋ ۇيىمى كوروناۆيرۋس پاندەمياسىن جاريالادى. قر پرەزيدەنتى قاسىم-جومارت توقاەۆتىڭ تاپسىرماسى بويىنشا الماتى قالاسىنىڭ تۇرعىندارى اراسىندا كوروناۆيرۋستىق ينفەكتسيا جاعدايى تىركەلگەن جاعدايدا ارەكەت ەتۋ الگوريتىمىنە سايكەس ءبىلىم بەرۋ مەكەمەلەرىنىڭ جۇمىس فورماتىنا وزگەرىستەر ەنگىزىلدى.
ەپيدەميولوگيالىق جاعداي تۇراقتانعانعا دەيىن قوسىمشا ءبىلىم بەرۋ نىساندارىندا (وقۋشىلار ءۇيى, مۋزىكالىق مەكتەپتەر) ءبىلىم بەرۋ پروتسەسىن جۇرگىزۋگە تىيىم سالىندى. سونىمەن قاتار, بالالاردىڭ ورىنى ساقتالادى, اتا-انالاردان وقۋ اقىسى الىنبايدى.
جالپى, الماتىدا 266 مەكتەپ, 80 كوللەدج بار. 16 ناۋرىزدان باستاپ مەكتەپتەردە دەمالىس جاريالاندى. وقۋشىلارعا دەمالىس كەزىندە ەكسكۋرسياعا بارۋعا تىيىم سالىندى. كوللەدج ستۋدەنتتەرى 16 ناۋرىزدان باستاپ قاشىقتان ءبىلىم الۋعا كوشەدى.
ءبىلىم بەرۋ سالاسىنداعى قىزمەتكەرلەر بويىنشا 3 سانات انىقتالدى:
1) اكىمشىلىك-باسقارۋ قىزمەتكەرلەرى – باسشى, ورىنباسارلار جانە تەحنيكالىق قىزمەتكەرلەر ادەتتەگى رەجيمدە جۇمىس ىستەيتىن بولادى;
2) ءپان مۇعالىمدەرى – ۇيدە وتىرىپ, قاشىقتان جۇمىس ىستەي الادى. بۇل رەتتە ولاردىڭ جالاقىسى تولىق كولەمدە ساقتالادى;
3) اقىلى ەڭبەك دەمالىسىن راسىمدەۋگە تىلەك بىلدىرگەن قىزمەتكەرلەردىڭ قالاۋى تولىق قاناعاتتاندىرىلادى.
الماتى