عاسىرعا جۋىق تاريحى بار وتاندىق بالالار باسىلىمى دارىندى, ۇشقىر ويلى بىرنەشە بۋىن جاستارعا تاربيە بەردى. بۇگىن 14 ناۋرىز - گازەتتىڭ تۇڭعىش جارىق كورگەن كۇنى.
بالالار مەن جاسوسپىرىمدەرگە ارنالعان گازەت 1930 جىلى 14 ناۋرىزدا «جاس الاش» گازەتىنىڭ 5-6 بەتتەرىندە گازەت ىشىندەگى گازەت بولىپ العاش جارىق كوردى. ول كەزدەگى باسىلىم اتاۋى «پيونەر» بولدى. ال سول جىلدىڭ قاراشاسىندا «پيونەر» دەربەس باسىلىمعا اينالدى.
باسىلىم ءار جاس وقىرمانىن ءسوز الەمىنە باۋلىپ, ولارعا شىعارماشىل ءارى رۋحاني ورتا قالىپتاستىرا ءبىلدى.
گازەتتىڭ قۇرىلۋىنا جازۋشىلار مەن قوعام قايراتكەرلەرى س. سەيفۋللين, ب. مايلين, ءى. جانسۇگىروۆ, ع. مۇسىرەپوۆ, س. ەسوۆا, م. اۋەزوۆ, س. مۇقانوۆ, س. بەگالين, ب. سوقپاقباەۆ اتسالىستى.
كەيىننەن گازەت اتى «وكتيابر بالالارى», «قازاقستان پيونەرى» دەپ وزگەرتىلدى.
ايتا كەتەتىنى, «قازاقستان پيونەرى» بولعان تۇستا گازەتكە 50 جىلدىق مەرەيتويىندا جاس ۇرپاققا سانالى تاربيە بەرۋ جولىنداعى ەڭبەگى ءۇشىن «قۇرمەت» وردەنى تابىستالدى.
ال 1990 جىلدان باستاپ گازەت اتاۋى «قازاقستان پيونەرىنەن» «ۇلان» بولىپ وزگەردى.
گازەتتى ءار جىلدارى ءا.يسمايىلوۆ, ءا.ىدىرىسوۆ, س.بەردىقۇلوۆ, ف.وڭعارسىنوۆا, ۋ.قاليجان, ب.قويشىباەۆ, ع.دوسكەن, ب.سۇلەيمەنوۆ, س.قالي ۇلى سياقتى قازاقتىڭ قابىرعالى قالامگەرلەرى باسقاردى.
قازىرگى ۋاقىتتا گازەتتىڭ باس رەداكتورى – جادىرا نارماحانوۆا.
«ۇلاننىڭ» مەكتەبىنەن وتكەن كەز كەلگەن وقۋشى سول كەزدەگى ومىرگە دەگەن بالالىق قىزىعۋشىلىعىن جوعالتپاس. بۇگىن سول جاس وقىرماننىڭ بارلىعى دەرلىك بىلىكتى مامانعا اينالىپ, ءتۇرلى سالادا الدىڭعى شەپتە قىزمەت ەتىپ ءجۇر. سونىڭ ىشىندە «ۇلان» قالام ۇستاعان تالاي جاستى جازۋعا باۋلىپ, بىرنەشە بۋىن قازاق جۋرناليستيكاسىنىڭ مايتالماندارىنا جول اشتى.
بيىل 90 جىلدىق مەرەيتويىن اتاپ ءوتىپ جاتقان بالالاردىڭ ءتول باسىلىمى وسى ۋاقىت ىشىندە قانشا ۇرپاقتىڭ ساناسىن قالىپتاستىرىپ, دۇنيەتانىمىن كەڭەيتتى. ولاردىڭ رۋحاني, مادەني دامۋىندا ۇلكەن ءرول اتقاردى.
باسىلىمنىڭ تۋعان كۇنىنە وراي قازاقستان رەسپۋبليكاسىنىڭ ۇلتتىق كىتاپحاناسى ارنايى كورمە ۇيىمداستىرىپ جاتىر.