شايبالى حوككەيدەن گاگارين كۋبوگى اياسىندا سىنعا ءتۇسىپ جاتقان ەلوردانىڭ «بارىسى» سىرت ايدىندا ماگنيتوگورسكىنىڭ «مەتاللۋرگ» كومانداسىنا قارسى ەكى ويىن وتكىزىپ, ەكەۋىندە دە جەڭىسكە جەتتى.
5 ناۋرىزدا وتكەن العاشقى ويىندا جەرلەستەرىمىز نەگىزگى ۋاقىتتا 1:1 ەسەبىمەن تەڭ ءتۇسىپ, وۆەرتايمدا جەڭىستى ج ۇلىپ الدى. ماتچتىڭ ءبىرىنشى جانە ەكىنشى كەزەڭىندە حوككەيشىلەر ءبىر-ءبىرىنىڭ قاقپاسىنا شايبا سوعا الماي, ءبىراز ابىگەرگە ءتۇستى. تەك ويىننىڭ ءۇشىنشى كەزەڭىندە عانا ەسەپ اشىلدى. 47-مينۋتتا «مەتاللۋرگ» ساپىنان سەرگەي موزياكين كوزگە تۇسسە, ارادا 2 مينۋت وتكەندە «بارىس» كاپيتانى داررەن ديتس ەسەپتى تەڭەستىردى. ال قوسىمشا ۋاقىتتا «بارىستىڭ» باعى جانىپ, جەڭىسكە جەتتى. «بارىستىڭ» جەڭىس گولىن لينۋس ۆيدەلل سوقتى. قورىتىندى ەسەپ – 2:1.
اراعا ەكى كۇن سالىپ «مەتاللۋرگ» پەن «بارىس» تاعى كەزدەستى. بۇل ويىندا دا جەرلەستەرىمىزدىڭ مەرەيى ۇستەم بولدى. ءبىرىنشى كەزەڭنىڭ سوڭعى مينۋتىندا انتون ساگادەەۆ ەسەپتى اشسا, 56-مينۋتتا داستين بويد «بارىستىڭ» ەكىنشى شايباسىن سوعىپ, ويىنىڭ نۇكتەسىن قويدى. ەسەپ – 2:0. ەكى كوماندا اراسىنداعى 4 ويىننان كەيىن «بارىس» 3:1 ەسەبىمەن العا شىقتى.