كەنشىلەر استاناسىنداعى «Saryarqa jastary» وبلىستىق ەرىكتىلەر شتابىندا «ۆولونتەر جىلى» اياسىنداعى ماڭىزدى ءىس-شارانىڭ ءبىرى ءوتتى. بۇل كۇنى وبلىس اكىمى جەڭىس قاسىمبەك وڭىردەگى ەرىكتىلەر قوزعالىسىنىڭ بەلسەندى مۇشەلەرىمەن كەزدەسىپ, الدا تۇرعان مىندەتتەر جايىندا پىكىر الماسىپ, ەمىن-ەركىن جاعدايدا اڭگىمە-دۇكەن قۇردى.
كەزدەسۋ بارىسىندا ءسوز العان قاراعاندى وبلىستىق جاستار ساياساتى ماسەلەلەرى جونىندەگى باسقارمانىڭ باسشىسى نۇرجان جەتپىسباەۆ ءوڭىردىڭ بارلىق قالالارى مەن اۋداندارىندا ەرىكتىلەردى قولداۋ ورتالىقتارىنىڭ اشىلا باستاعانىن حابارلادى.
– ەرىكتىلەر قوزعالىسىنا بارىنشا كوپ ادامدى تارتۋ ءبىزدىڭ مىندەتىمىز. «اسىل مۇرا» جوباسى اياسىندا ەرىكتىلەر تاريحي جانە مادەني ەسكەرتكىشتەردى قالپىنا كەلتىرۋگە كومەكتەسەتىن بولادى. تاعى ءبىر اۋقىمدى جوبا – «مەيىرىم» جوباسى. اتالعان جوبا بالالار ءۇيىنىڭ تاربيەلەنۋشىلەرىنە قوعامدىق ومىرگە بەيىمدەلۋگە, بولاشاق ماماندىقتى تاڭداۋ ماسەلەسىندە كومەك كورسەتۋدى ماقسات ەتەدى. ۆولونتەرلىك ۇيىمدار جاز ايلارىنا دەيىن بالالاردىڭ اۋلالىق الاڭقايلارىن رەتكە كەلتىرۋ ءۇشىن «SJ» اكتسياسىن باستايدى, – دەدى وبلىس جاستارىنىڭ جەتەكشىسى.
سونىمەن قاتار, ول ۆولونتەرلىك جوبالاردىڭ جەتى باعىت بويىنشا بىرىكتىرىلەتىنىن جەتكىزدى. مىسالى, سونىڭ ءبىرى – «تەگىن تاكسي» جوباسى. قازىردىڭ وزىندە اتالعان شاراعا قاتىسۋعا بىرنەشە تاكسوپارك كەلىسىم بەرگەن ەكەن. ءىس ءتۇيىنى بىلايشا شەشىلمەك: ۆولونتەرلەر شتاب قۇرىپ, قالا بويىنشا ءجۇرىپ-تۇرۋى قيىن ادامداردان وتىنىشتەر قابىلدايدى. ياعني, ۇلى وتان سوعىسىنىڭ ارداگەرلەرى مەن تىل ەڭبەككەرلەرى, جالعىز باستى قارت ادامدار, سونداي-اق كوپ بالالى وتباسىلار تاكسي كولىكتەرىن تەگىن پايدالانا الادى.
كەزدەسۋگە كەلگەن ەرىكتىلەردىڭ جاس شاماسى دا ارقيلى بولدى. ولاردىڭ اراسىنداعى «كۇمىس ەرىكتىلەر» توبىنا جاتاتىن 55 جاستان اسقان اعا بۋىن وكىلدەرى وزدەرىنىڭ جەتىستىكتەرىمەن جانە جوسپارلارىمەن ءبولىستى.
مىسالى, تەمىرتاۋ قالالىق ارداگەرلەر كەڭەسىنىڭ توراعاسى بىرلىكباي ورداباەۆ «ەرىكتى بولۋ تەك جاستاردىڭ عانا ءىسى دەگەن دۇرىس ەمەس» دەگەن پىكىرىن ورتاعا سالدى.
– ەگدە جاستاعى ادامدار دا قوعامعا پايدا تيگىزسەم دەيدى, ولار ءوز ءبىلىمى مەن تاجىريبەسىمەن بولىسۋگە ءاردايىم دايىن. مىسالى, ءبىزدىڭ ۇيىم «شاڭىراق» ۆولونتەرلىك ورتالىعىمەن تىعىز قارىم-قاتىناس ورناتقان. اتالعان ورتالىقتىڭ كومەگىمەن ماسكەۋگە «كۇمىس ۆولونتەرلەر» فورۋمىنا بارۋ مۇمكىندىگى تۋدى, – دەدى ول.
وبلىس اكىمى جەڭىس قاسىمبەك ەرىكتىلىكتىڭ ءپاتريوتيزمنىڭ جوعارى كورىنىسى ەكەنىن ەرەكشە اتاپ ءوتتى. وسى تۇرعىدان كەلگەندە ول ۆولونتەرلەر قوزعالىسىنىڭ اياسىن كەڭەيتىپ, جاڭا ازاماتتىق باستامالاردى ۇسىنۋعا شاقىردى.
– مەملەكەت باسشىسى ايتقانداي, ەرىكتىلەر سەنبىلىكتەرمەن جانە ءبىر جولعى چەللەندجدەرمەن عانا شەكتەلمەۋى كەرەك. الترۋيزم – ومىرلىك قاعيداتتاردىڭ ءبىرى. سوندىقتان, يگى ىستەردە ناۋقانشىلىق دەگەن بولمايدى. ءبىز ءبارىمىز بىرىگىپ, ءوزىمىزدىڭ ءومىرىمىزدى جاقسارتامىز, – دەپ تۇيىندەدى ءسوزىن ءوڭىر باسشىسى.
كەزدەسۋدىڭ سوڭىندا ەرىكتىلەرگە كومەك رەتىندە وڭىرلىك رەسۋرستىق ورتالىق اشىلىپ, شەبەرلىك ساباقتارى, ترەنينگتەر مەن وقىتۋ سەمينارلارىنىڭ ۇيىمداستىرىلاتىنى حابارلاندى. مۇنداي ىزگى دە يگى ءىس-شارالاردىڭ ءوز ەركىمەن, جۇرەك قالاۋىمەن قوعامعا قايتسەم پايدامدى تيگىزەم دەپ جۇرگەن جومارت جۇرەكتى جاندارعا مىقتى قولداۋ بولاتىنى ءسوزسىز.
قاراعاندى وبلىسى