ۇكىمەت ساۋدانى دامىتۋدىڭ جاڭا باعدارلاماسىنىڭ تۇجىرىمداماسىن بەكىتتى. بۇل تۋرالى بۇگىنگى ۇكىمەت وتىرىسىندا ايتىلدى.
ساۋدا جانە ينتەگراتسيا ءمينيسترى باقىت سۇلتانوۆ ۇكىمەت وتىرىسىندا ساۋدانى دامىتۋدىڭ جاڭا تۇجىرىمداماسىن تانىستىردى. ءمينيستردىڭ سوزىنشە, ساۋدا قازاقستاننىڭ ءجىو-ءنىڭ 17 پايىزىن قۇرايدى. 2019 جىلدىڭ قورىتىندىسى بويىنشا سالانىڭ ءوسۋ قارقىنى 7,6 پايىزدى قۇراعان. ال جۇمىسپەن قامتىلعان قىزمەتكەرلەردىڭ سانى 1,4 ملن ادامعا جەتكەن. قازاقستاننىڭ سىرتقى ساۋدا اينالىمى 96,1 ملرد دوللار بولىپ وتىر.
«ازىرلەنىپ جاتقان مەملەكەتتىك باعدارلامانىڭ ماقساتى – نارىقتى ساپالى ونىممەن تولىقتىرۋدى جانە ەكسپورتتىق تاۋارلار مەن قىزمەتتەردىڭ باسەكەگە قابىلەتتىلىگىن قامتاماسىز ەتەتىن زاماناۋي ساۋدا جۇيەسىن قۇرۋ جانە دامىتۋ», - دەدى ول.
«قۇجاتتا قولايلى تۇتىنۋ ورتاسىن قۇرۋعا, حالىقتى ساپالى جانە قاۋىپسىز تاۋارلارمەن قامتاماسىز ەتۋگە, سونداي-اق قازاقستاندىق تاۋارلار مەن قىزمەتتەردىڭ سىرتقى نارىقتاردا باسەكەگە قابىلەتتىلىگىن ارتتىرۋعا باعىتتالعان باعدار ورناتىلۋى ءتيىس. سونداي-اق حالىقارالىق ىنتىماقتاستىق اياسىندا ۇلتتىق مۇددەلەردى قورعاۋ جانە ىلگەرىلەتۋ ازىرلەنىپ جاتقان باعدارلامانىڭ باستى ماقساتتارىنىڭ ءبىرى بولۋى كەرەك», - دەدى ۇكىمەت باسشىسى اسقار مامين.