سەناتتا الەۋمەتتىك-مادەني دامۋ جانە عىلىم كوميتەتىنىڭ مۇشەلەرى شەتەلدىك جۇمىس كۇشىن تارتۋ ماسەلەلەرى بويىنشا ۋاكىلەتتى ورگاندار وكىلدەرىمەن كەزدەستى. بۇل تۋرالى سەناتتىڭ ءباسپاسوز قىزمەتى حابارلادى.
جۇزدەسۋگە سەنات دەپۋتاتتارى, ەڭبەك جانە حالىقتى الەۋمەتتىك قورعاۋ, ىشكى ىستەر, سىرتقى ىستەر, يندۋستريا جانە ينفراقۇرىلىمدىق دامۋ مينيسترلىكتەردىڭ وكىلدەرى, سونداي-اق «اتامەكەن» ۇلتتىق كاسىپكەرلەر پالاتاسىنىڭ قىزمەتكەرلەرى قاتىستى.
ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ءوز سوزىندە ەڭبەك كودەكسىنە سايكەس تەڭ جاعدايدا بىردەي جۇمىستى اتقاراتىن قىزمەتكەرلەر اراسىندا ەڭبەكاقى تولەۋدە سايكەسسىزدىكتەرگە جول بەرىلمەيتىنىن اتاپ ءوتتى. الايدا, ەڭبەك ميگرانتتارىن اكەلەتىن كومپانيالاردىڭ ءتيىستى تالاپتاردى ساقتاماي وتىرعانى تۋرالى دەرەكتەر انىقتالىپ وتىر. «باس پروكۋراتۋرامەن بىرلەسكەن تەكسەرۋ بارىسىندا ەڭبەك جانە كوشى-قون زاڭناماسىن بۇزۋدىڭ 1008-دەن استام دەرەگى انىقتالدى, ونىڭ ىشىندە 27 كاسىپورىندا 479 فاكتى ورىن العان. زاڭ بۇزۋشىلىقتاردىڭ ەڭ كوبى اقتوبە, شىعىس قازاقستان جانە اتىراۋ وبلىستارىندا انىقتالدى», - دەدى مينيستر.
سەناتورلار تالقىلاۋ بارىسىندا وڭىرلەرگە ساپاردا بولعان كەزدە ازاماتتار وتاندىق جانە شەتەلدىك قىزمەتكەرلەر اراسىنداعى ەڭبەكاقىنىڭ تەڭ بولماي وتىرعانى بىرنەشە رەت كوتەرىلگەنىن اتاپ ءوتتى.
ب.نۇرىمبەتوۆ شەتەلدىك جانە قازاقستاندىق قىزمەتكەرلەر اراسىنداعى كەمسىتۋشىلىك فاكتىلەرىن بولدىرماۋ ماقساتىندا سانيتارلىق-تۇرمىستىق بىردەي جاعداي جاساۋدى كوزدەيتىن ەڭبەك ماسەلەلەرى جونىندەگى زاڭ جوباسى ءماجىلىس قاراۋىندا جاتقانىن جەتكىزدى.
سەنات دەپۋتاتتارى ءوز ماماندارىمىزدى دايارلاۋ ارقىلى شەتەلدىك قىزمەتكەرلەردى اۋىستىرۋ ماسەلەسىن كوتەردى. ءبىرجان نۇرىمبەتوۆ جاۋاپ رەتىندە ءتيىستى ەرەجەلەر ەنگىزە وتىرىپ, جۇمىس كۇشىن جوسپارلاۋداعى شەكتەۋلەر تۋرالى ايتتى. ء«بىز قازاقستاندىق جۇمىسشىلاردى اۋىستىرۋ جونىندەگى ەرەجەنى قايتا ەنگىزگىمىز كەلەدى. ول ءبىزدىڭ مامانداردىڭ بىلىكتىلىگىن ارتتىرۋعا مۇمكىندىك بەرەدى. قازىر وسى ەرەجەنىڭ ءبارى مەملەكەتتىك ورگانداردىڭ كەلىسىمىندە جاتىر», - دەدى مينيستر.
سەناتورلار ءوز كەزەگىندە ىشكى ەڭبەك نارىعىن قوسىمشا قورعاۋعا جانە جەرگىلىكتى اتقارۋشى ورگاندارعا قازاقستاندىق ازاماتتاردى جۇمىسقا ورنالاستىرۋعا مۇمكىندىك بەرەتىن شارالارعا قولداۋ ءبىلدىردى.
ىشكى ىستەر ءمينيسترىنىڭ ءبىرىنشى ورىنباسارى مارات قوجاەۆ جۇمىس ورىندارىنا شەتەلدىكتەردى زاڭسىز تارتۋدى اسا وتكىر ماسەلەلەردىڭ ءبىرى رەتىندە اتادى. ءمينيستردىڭ ءبىرىنشى ورىنباسارىنىڭ ايتۋىنشا, بۇل كوبىنەسە الەۋمەتتىك شيەلەنىستىڭ ءوسۋىن تۋىنداتادى جانە كاسىپورىنداردا اشىق قاقتىعىستارعا اينالۋى دا كوبىرەك.
كوميتەت توراعاسى مۇرات باقتيار ۇلى تالقىلاۋدى اياقتاي كەلىپ, شەتەلدىك جۇمىس كۇشىن تارتۋدى رەتتەۋ ماسەلەسى مەملەكەت ءۇشىن دە, جالپى قوعام ءۇشىن دە ماڭىزدى ەكەنىن اتاپ ءوتتى.